120 dron jetkiliksiz – Ekologııa mınıstri orman órtimen kúreske qosymsha dron kerek dep otyr

ASTANA. KAZINFORM – Eldegi 158 orman sharýashylyǵynyń 126-synda ǵana órtke qarsy dron bar. Al normatıv boıynsha ár sharýashylyqta keminde 1 dron bolý kerek. Ekologııa jáne tabıǵı resýrstar mınıstri Erlan Nysanbaev Úkmiet otyrysynan keıin ótken baspasóz máslıhatynda osyndaı derek aıtty.

— Ázirge bizde 120 dron bar. Ótken aptada «Qazaqtelekommen» birlesip órt qaýipsizdigi joǵary orman sharýashylyqtarǵa solardyń dronyn qosý týraly kelistik. Ol drondardyń birden-bir artyqshylyǵy aqparatty júıeli túrde, birden daǵdarys ortalyǵyna berýge bolatynynda, — dedi ol.

Mınıstrdiń sózinshe, orman sharýashylyqtaryn dronmen tolyq qamtamasyz etpeı otyrǵan mınıstrlik emes, jergilikti ákimdikter.

— 120 dron degen, árıne jetkiliksiz. Qosymsha drondar alý protsesi bastaldy. Bıylǵa ol úshin respýblıkalyq bıýdjetten qarjy surap otyrǵan joqpyz. Jergilikti bıýdjetter esebinen alýdy josparlaǵanbyz, — dedi ol.

Mınıstrliktiń baspasóz qyzmeti qosymsha bergen málimetke súıensek, eldegi 158 orman sharýashylyǵynyń 126-synda ǵana qajetti dron bar. Qalǵan 28 orman sharýashylyǵyn dronmen jabdyqtaýǵa respýblıkalyq bıýdjetten qarajat qarastyrylmaǵan. 

Aıta keteıik, búgingi Úkimet otyrysynda Premer-mınıstr Oljas Bektenov orman órtiniń aldyn alýǵa pılotsyz ushatyn apparattardy kóbirek tartý týraly tapsyrma bergen edi.