120-dan asa júırik, 10 mln teńge júlde qory: Atyraýda alaman báıge ótti
ASTANA. KAZINFORM — Atyraý qalasyndaǵy Aqsaı atshabarynda QR Konstıtýtsııasynyń 30 jyldyǵyna arnalǵan respýblıkalyq at báıgesi ótkizildi, dep habarlaıdy Óńirlik kommýnıkatsııalar qyzmeti.
Jarysty Atyraý oblystyq dene shynyqtyrý, sport jáne týrızm basqarmasynyń qoldaýymen «Báıge» federatsııasy uıymdastyrdy.
Jarysqa elimizdiń birneshe óńirinen 120-dan astam júırik qosylyp, 1500-ge jýyq kórermen ulttyq sporttyń tartysty sátterin tamashalady. Baǵdarlamada taı jarys (6 shaqyrym), qunan jarys (9 shaqyrym), top báıge (18 shaqyrym) jáne alaman báıge (24 shaqyrym) qashyqtyqtary qamtyldy.
— Bul báıge — ulttyq sportty dáripteý men jastardy otansúıgishtikke tárbıeleýge baǵyttalǵan mańyzdy shara. Konstıtýtsııanyń 30 jyldyǵy aıasynda uıymdastyrylyp otyrǵan at jarysy el birligin nyǵaıtyp, salt-dástúrimizdi dáripteýge úlken úles qosyp otyr, — dedi Atyraý oblystyq dene shynyqtyrý, sport jáne týrızm basqarmasynyń basshysy Nurbol Sydyqov.
Jarys qorytyndysynda ár sanat boıynsha jeńimpazdar anyqtaldy. Taı jarysta Batys Qazaqstan oblysynan kelgen «Medına» júırigi birinshi oryndy ıelendi. Qunan jarysta Aqjaıyqtyq «Bórte» sáıgúligi top jarsa, ekinshi oryndy Atyraýdan qosylǵan «Qyzquıryq» ıelendi. Top báıgede Mańǵystaý oblysynyń «Sarhan» aty aldyna jan salmaı, jeńimpaz atandy. Al alaman báıgede 24 shaqyrymdy eń qysqa ýaqytta júgirip ótken «Aqbaıan» júırigi márege birinshi bolyp keldi.
— Bul jeńis men úshin erekshe qýanysh. At sportymen aınalysyp kele jatqanyma 3 jylǵa jýyq ýaqyt boldy. Báıgege shyǵarǵan «Sarhan» atty júırigimiz Reseıden kelgen at. Ulttyq sportqa degen qyzyǵýshylyqtyń joǵary ekenin kórip, shabyttanamyz. Kórermenderdiń qoldaýy bizge erekshe kúsh berdi, — dedi top báıgeniń jeńimpazy Nasıhat Abdýlla.
Atbegilerdiń aıtýynsha, árbir jeńis artynda úlken eńbek pen júıeli daıyndyq jatyr.
— Júırikti baptaý — tabandylyq pen tózimdilikti talap etedi. Ár jarys — tájirıbe, ár báıge — shyńdalý. Búgingi jeńis búkil komanda eńbeginiń jemisi, — dedi «Sarhan» júıriginiń bapkeri Sársenbek Orynbaev.
Báıge jeńimpazdaryna berilgen júlde qory 10 mıllıon teńgege jýyq. Alaman báıgeniń úzdigi 1 mıllıon 800 myń teńge, top báıgeniń jeńimpazy 1 mıllıon 200 myń teńge ıelendi. Qalǵan sanattarda da úzdik shyqqandar laıyqty marapattalyp, qarjylaı syılyqtarǵa qol jetkizdi.
Uıymdastyrýshylardyń aıtýynsha, ulttyq sportty dáripteıtin mundaı jarystar aldaǵy ýaqytta da dástúrli túrde jalǵasyn tappaq.
Budan buryn Qazalyda respýblıkalyq at báıgesi qorytyndylandy.