70-ten 120 teńgege deıin: Qazaqstan qalalaryndaǵy avtobýs jolaqysy
AQTÓBE. KAZINFORM — Qazaqstan aımaqtarynda qoǵamdyq kóliktiń jolaqysy ártúrli. Bul kóbine jergilikti ákimdik pen tasymaldaýshylar arasyndaǵy kelisim arqyly júrgiziledi. Al tasymaldaý QR «Avtomobıl kóligi týraly» zań aıasynda atqarylady.
Jolaýshy quqyqtary men mindetteri
«Avtomobıl kóligi týraly» zańnyń 20-babynda jolaýshylardyń quqyqtary men mindetteri anyq jazýly. Kez kelgen adam dittegen jetine jetý úshin avtobýs, trolleıbýs jáne taksı qyzmetin paıdalana alady. Qyzmetti paıdalanǵan jolaýshy bılet qunyn tóleıdi. Talap boıynsha 7 jastan 15 jasqa deıingi balalarǵa jol júrý qujatynyń (bıletiniń) tolyq qunynyń 50% tólep, jol júrý qujattaryn (bıletterin) satyp ala alady. Sonymen birge zańda «Áleýmettik mańyzy bar qatynastarda, sondaı-aq jolaýshylar men bagajdy qalalyq (aýyldyq), qala mańyndaǵy qatynastarda avtomobılmen turaqty tasymaldaýlarda „Altyn alqa“, „Kúmis alqa“ alqalarymen nagradtalǵan nemese buryn „Batyr ana“ ataǵyn alǵan, sondaı-aq I jáne II dárejeli „Ana dańqy“ ordenderimen nagradtalǵan kópbalaly analardyń, birinshi toptaǵy múgedektigi bar adamdardyń tegin jol júrýge, al 15 jastan 18 jasqa deıingi adamdardyń jol júrý qujatynyń (bıletiniń) tolyq qunynyń elý paıyzyn tóleı otyryp, jol júrý qujatyn (bıletin) satyp alýǵa quqyǵy bar», — dep anyq jazýly tur.
Tasymaldaýshynyń quqyqtary men mindetteri
«Avtomobıl kóligi týraly» zańnyń 22-babynda tasymaldaýshynyń quqyqtary men mindetteri kórsetilgen. Ondaǵy quqyqtary:
— Qoǵamdyq kólikte jol júrgeni úshin aqy tóleýdi qamtamasyz etý, sondaı-aq aqy tóleý faktilerin tekserý úshin kóliktik baqylaý qyzmetin qurýǵa;
— jolaýshylardyń qoǵamdyq tártipti jáne jolaýshylar men bagajdy avtomobıl kóligimen tasymaldaý qaǵıdasyn saqtaýyn talap etýge quqyqy.
Tasymaldaýshy óz mindetterin de tolyq bilýi tıis. Zań boıynsha tańnan bastap shyǵatyn avtobýs tehnıkalyq jaramdy bolýy kerek. Sonymen birge tehnıkalyq, ekologııalyq, sanıtarııalyq-epıdemıologııalyq talaptar men órt qaýipsizdigi erejesi saqtalýy tıis. Al júrgizýshileri reıs aldynda medıtsınalyq tekserýden ótedi. Sonymen birge olardyń eńbek jáne tynyǵý rejımi qatań saqtalýy qajet. Tasymaldaýshy «Avtomobıl kóligi týraly» zańy aıasynda azamattardyń jekelegen sanattaryn aqysyz tasymaldaıdy jáne jeńildik beredi.
Tarıfterdi bekitý jáne aımaqtardaǵy tarıf
«Avtomobıl kóligi týraly» zańnyń 19-babynda tarıftiń jergilikti atqarýshy organnyń sheshimimen bekitiletini kórsetilgen. Sonymen birge jergilikti atqarýshy organdar QR zańnamasyna sáıkes tasymaldaýshylardyń zalalyn sýbsıdııalaıdy.
Qazir elimizdiń kópshiliginde dál osy jeńildik qarastyrylǵan. Nátıjesinde keıbirinde balalar, endi birinde zeınetkerler qoǵamdyq kólikte tegin júredi.
Qazaqstannyń barlyq aımaǵyn saralaı kele elimizdegi eń tómen jolaqy Aqtaý, Túrkistan, Shymkent qalalarynda ekeni belgili boldy. Úsh qalada qoǵamdyq kólikte júrý quny eresekterge — 70 teńge.
Aqtaýda bılet qunyn qolma-qol tóleseńiz jolaqy 150 teńge bolyp eki eselenedi. Al Túrkistan qalasynda 100 teńge tóleý qajet bolady. Qazaqstandaǵy Qonaev, Aqtóbe, Atyraý, Semeı, Taldyqorǵan, Jezqazǵan qalalarynda jolaqy eresekterge — 80 teńge.
Bul — tek QR kod jáne jolaýshylar tasymaldaýǵa arnalǵan arnaıy qosymsha arqyly tólegen adamdarǵa analǵan tarıf. Munda da arnaıy karta bolmasa tarıf kúrt ósedi. Máselen Taldyqorǵanda qolma-qol esep aıyrysý úshin 120 teńge tóleý qajet bolady. Esesine oqýshylar, kópbalalaly analar men zeınetkerler tegin júredi. Olar úshin jeńildik qarastyrylǵan. Atyraý men Aqtóbe turǵyndary úshin qolma-qol jolaqy 150 teńge dep bekitilgen.
Bir ereksheligi Aqtóbede І, ІІ top múgedekteri, zeınetkerler tegin júredi. Al oqýshylar 40 teńge tóleıdi. Olar úshin arnaıy qosymsha kartasy shyǵarylǵan. Atyraý qalasynda da jeńildikter bar. І, ІІ top múgedekterine jolaqy tegin, ІІІ top múgedegine 50 paıyzdyq jeńildik bar.
Stýdentter qoǵamdyq kólikke eki ret tegin minedi, sodan soń jolaqy tóleýi tıis. «Altyn alqa», «Kúmis alqa» ıegerleri de avtobýsta tegin qatynaıdy. Zeınetkerler jolaqynyń 50% tóleıdi. Oqýshylar sabaq kezinde qoǵamdyq kólikte tegin júredi.
Qonaev qalasyndaǵy bir erekshelik, jolaqysy 80 teńge bolǵanymen, qolma-qol tóleseńiz birden 200 teńge tóleý qajet.
Jezqazǵan qalasynda da І, ІІ, ІІІ toptaǵy múgedekter, jasy kelip zeınetke shyqqan qarııalar, «Altyn alqa», «Kúmis alqa» ıegerleri, bala jasynan 16 jasqa deıingi múgedek balalardy tárbıeleıtin analar, úıde qyzmet kórsetetin áleýmettik qyzmetkerler, 18 jasqa tolmaǵan balalar, asyraýshysynan aıyrylý jaǵdaıy boıynsha memlekettik áleýmettik járdemaqy alýǵa quqyǵy bar adamdar qoǵamdyq kólikte aqysyz júre alady.
Al Qyzylorda men Taraz qalasynda jolaqy — eresekterge 85 teńge. Qolma-qol esep aıyrysý eki qalada da 130 teńge dep bekitilgen. Tarazda oqýshylar kartamen tólese 40 teńge shegeriledi.
Óskemen qalasynda jolaqy 90 teńge dep bekitilgen.
Qazaqstan boıynsha 6 qalada jolaqy — 100 teńge. Olar — Petropavl, Pavlodar, Oral, Qaraǵandy, Qostanaı jáne Kókshetaý. Bul qalalarda da qolma-qol tóleý kezinde jolaqy quny ózgeredi. Máselen Kókshetaýda 180, Qostanaıda 170, Oralda 200 teńge bolady.
Al Astana qalasynda jolaqy qazirgi kezde 110 teńge.
Elimiz boıynsha eń qymbat qalaishilik tasymal — Almaty qalasynda. Munda qosymsha arqyly 120 teńge tóleý kerek. Qolma-qol aqsha qabyldanbaıdy.
