120 ball da grantqa kepildik bermeıdi, 100 ball jınaǵan talapker qalaı túsip ketti
ASTANA. KAZINFORM – UBT-dan joǵary ball jınaý bilim berý grantyn ıelenýge múmkindik beredi, alaıda onyń ózi grant alýǵa kepildik bermeıdi. Sebebi memlekettik bilim berý granttary talapkerdiń jınaǵan balyna emes, naqty bilim berý baǵdarlamasy boıynsha qalyptasqan konkýrs nátıjesine qaraı bólinedi, dep habarlaıdy Ǵylym jáne joǵary bilim mınıstrligi.
Grant konkýrsynyń nátıjesine talapker tańdaǵan bilim berý baǵyty, sol baǵytqa bólingen granttar sany, úmitkerler sany, básekelestik deńgeıi jáne jekelegen sanattarǵa qarastyrylǵan kvotalar áser etedi.
– Mysaly, 120 ball jınaǵan talapker joǵary básekelestik bar bilim berý baǵdarlamasyn tańdasa, grant sanyna qaraǵanda talapkerler sany aıtarlyqtaı kóp bolǵan jaǵdaıda grant ıegeri bolmaýy múmkin. Al 100 ball jınaǵan talapker básekelestigi tómen baǵyt boıynsha grantqa ıe bolýy múmkin, – delingen habarlamada.
Mamandar shekti ball men grantqa ótý balynyń aıyrmashylyǵyna da nazar aýdartady. Shekti ball talapkerge konkýrsqa qatysýǵa múmkindik beredi, biraq grant ıelenetinine kepildik bermeıdi. Al grantqa ótý baly konkýrs aıaqtalǵannan keıin talapkerlerdiń nátıjelerine qaraı qalyptasady.
Sondyqtan mamandyq pen bilim berý baǵdarlamasyn tańdaý kezinde UBT nátıjesimen qatar, sol baǵytqa qansha grant bólingenin jáne talapkerler arasyndaǵy básekelestik deńgeıin eskergen jón.
– Grant – bul joǵary baldyń ǵana emes, naqty konkýrs nátıjesiniń qorytyndysy, – dep túsindirdi mınıstrlikten.
Aıta keteıik, bilim granty ıegerleriniń tizimi shyqty.
