12 jyldyq mekteptiń alǵashqy túlekteri 2014-2015 oqý jyly bitirip shyǵady
ASTANA. QazAqparat -12 jyldyq bilim berý boıynsha mekteptiń alǵashqy túlekteri 2014-2015 oqý jylynda bitirip shyǵady. Búgin Májilistiń Áleýmettik-mádenı damý komıtetiniń keńeıtilgen otyrysynda Bilim jáne ǵylym vıtse-mınıstri Esenǵazy Imanǵalıev osylaı málimdedi. Eske sala keteıik, basqosýda bastaýysh bilim berýdiń memlekettik jalpyǵa mindetti standarttary máselesi talqylanǵan bolatyn.
«Tutastaı alǵanda, elimizde 12 jyldyq bilim berýge kóshý máselesi jan-jaqty zerttep, taldandy. Halyqaralyq tájirıbeler kóptegen elderde bilim berý on eki jylǵa jalǵasatynyn kórsetip otyr. Al 6 jastan bastap mektepke qabyldaý Ekonomıkalyq yntymaqtastyq jáne damý uıymynyń 21 elinde jáne álem elderiniń 60 paıyzynda qoldanylady», - dedi Bilim jáne ǵylym vıtse-mınıstri Esenǵazy Imanǵalıev.
Onyń aıtýynsha, bir jylǵa uzartylǵan bastaýysh mekteptiń jańa modeli balalardyń damýyndaǵy ótpeli daǵdarystyq kezeńder boıynsha psıhologııa-fızıologııalyq erekshelikterdi eskeredi.
«2003 jyldan beri 12 jyldyq bilim berý úlgisi boıynsha synaq jumystary júrgizilip keledi. Respýblıkanyń 104 mektebinde 1 myń 233 oqýshy osy oqytý úlgisymen qamtylǵan. 6 jasynan bastap qabyldanǵan 12 jyldyq bilim berý boıynsha alǵashqy túlekter 2014-2015 oqý jylynda bitirip shyǵady. Synaq retinde júzege asqan synyptardyń bitirýshileri joǵary oqý oryndarynda bilimin jalǵastyrǵysy kelse, jalpylama negizde 2015 jyly Ulttyq biryńǵaı testileýge qatysatyn bolady», - dedi vıtse-mınıstr. Onyń aıtýynsha, qazirgi tańda osy sanattaǵylarǵa arnalǵan testileý suraqtary synaqtyq bilim berý erekshelikteri eskerile otyryp ázirlenýde.
