12 jyldyq bilim júıesi: OQO-da alǵashqy túlekter túlep ushty
ShYMKENT. QazAqparat - Ońtústik Qazaqstan oblysyndaǵy 1 038 bilim uıymynda «El júregi - Astana» atty saltanatty sońǵy qońyraý sharasy ótti. Túlekterdi quttyqtaý úshin oblys ákimi Janseıit Túımebaev Hımııa bıologııa baǵytyndaǵy N.Nazarbaev zııatkerlik mektebiniń sońǵy qońyraý sharasyna qatysty, dep habarlaıdy QazAqparat tilshisi.
Saltanatty jıynda sóz alǵan óńir basshysy ońtústikqazaqstandyq 33 766 mektep bitirýshini quttyqtady.
«Sizder Elbasy armandaǵan «Máńgilik el» - ıdeıasynyń qurylysshylary ekenderińizdi eshqashan esten shyǵarmańyzdar. Elbasy óziniń halyqqa Joldaýynda jastardy bilimdi, eńbekqor, bastamashyl, belsendi bolýǵa jas kezinen bastap daǵdylanýyn basty nazarǵa aldy. Memleket júzege asyryp jatqan túbegeıli reformalar men atqaryp jatqan qyrýar isterdiń bári sizder úshin jasalýda», - dedi Janseıit Túımebaev.
Sonymen qatar, aımaq basshysy «Nazarbaev Zııatkerlik mektepteri» derbes bilim berý uıymy zııatker urpaqty tárbıeleýde tek mektep qabyrǵasymen shektelmeı, bilim berýdegi úzdik tájirıbeleri men jobalaryn qala, oblys, respýblıka kólemine taratýda keńinen atsalysyp jatqanyna toqtaldy. Budan ózge, oblys basshysy mektep kitaphanasynyń qoryna «Jahan tanyǵan jeti tulǵa», «Túrkitanýdyń tarıhı-lıngvıstıkalyq negizderi» atty týyndylardy tartý etti. Sondaı-aq, urpaq tárbıesi úshin ter tógip júrgen birqatar ustazdardy marapattady.
Aıta keterligi, bıyl 12 jyldyq bilim júıesimen oqyǵan oqýshylardyń alǵashqy túlekteri mektep bitirdi. Aǵymdaǵy jylǵy oqý jylynda Hımııa -bıologııa baǵytyndaǵy Nazarbaev zııatkerlik mektebin 97 túlek aıaqtady. Olardyń 30-dan astamy sheteldik JOO-ǵa qujat tapsyryp, qazirgi tańda 17 túlek tegin oqý grantyna ıe bolǵan. Bul álemdik reıtıngtiń úzdik 100 ýnıversıtetine kiretin Amerıka, Germanııa, Koreıa, Qytaı, Reseı, Kanada elderiniń joǵary oqý oryndary.
Jalpy bıylǵy oqý jylynda óńirdegi 1038 mektepte 634 myńǵa jýyq oqýshy bilim aldy. Onyń ishinde 33 766 oqýshy mektepti bıyl bitiredi. Respýblıkadaǵy bitirýshi 147 myńnan asa oqýshynyń árbir besinshisi Ońtústik óńiriniń túlegi.
