12 jyldyq bilim berýge kóshý mektepke deıingi bilim berý esebinen júzege asatyn bolady - BǴM
Eske salaıyq, jalpy otyrysta «2015-2017 jyldarǵa arnalǵan respýblıkalyq bıýdjet týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zań jobasy maquldanǵan bolatyn. Toqtala ketetin jaıt, buǵan deıin mınıstrlik 12 jyldyq bilim berýdi ýaqytsha toqtatý týraly málimdegenimen, keıin Elbasy atalǵan júıege kezeń-kezeńimen kóshý týraly tapsyrma júktegen bolatyn. Osydan keıin, bilim jáne ǵylym mınıstrligi «1+11» úlgisin qarastyrǵan bolatyn. Alaıda, depýtattardyń aıtýynsha, bul úlgi júıeni iske asyrý tetigin naqty ári tolyq túsindirip bermeıdi. «Elbasynyń tapsyrmasyna sáıkes, bilim berý júıesi eshqandaı da qıynshylyqtarǵa qaramastan damıdy. Sondyqtan da, qoldanystaǵy 11 jyldyq júıe saqtalyp, 12 jyldyq bilim berýge kóshý mektepaldy daıyndyq esebinen júzege asatyn bolady. Qazirgi tańda 6 jastaǵy balalardyń 95 paıyzy osy baǵdarlama arqyly ótedi. Jalpyǵa mindetti bastaýysh bilim berý standarty qazir daıyn. Buǵan bilim berý standartyn sáıkestendirý jumystary atqarylýda», - dedi Aslan Sárinjipov. Onyń aıtýynsha, jańa standarttarǵa qatysty zańnamalyq ózgerister engizý de kózdeledi. Sosyn naýryz aıynda Úkimettiń otyrysynda bilim máseleleri tolyq talqylanady. «Jalpy atalǵan jumystar qazirgi tańda qosymsha qarajat talap etpeıdi, qosymsha mektepter salý da qajet emes. Bıylǵy jylǵy qarastyrylǵan bıýdjet tolyǵymen jetkilikti», - dedi A. Sárinjipov.
