12 jyldyq bilim berýde mektep aldyndaǵy bir jyl daıarlyq qarastyrylady - A. Sárinjipov
ASTANA. QazAqparat - 12 jyldyq bilim berýge birtindep kóshý jalǵasady. Bul týraly búgin QR Bilim jáne ǵylym mınıstrliginiń alqa májilisi aldyndaǵy brıfıngte atalǵan vedomstvonyń basshysy Aslan Sárinjipov málim etti.
Osy oraıda mınıstr Elbasy Nursultan Nazarbaev Úkimettiń keńeıtilgen otyrysynda bilim salasyn jańartý baǵdarlamasyn jalǵastyrýdy tapsyrǵanyn eske salyp ótti.
«Biz bolashaq ekonomıka úshin kadrlardy daıarlap, sapaly bilim berýimiz qajet. Sondyqtan da osy salanyń baǵdarlamalary budan ary qaraı da damytylady. Orta bilim berý qurylymyna toqtalatyn bolsaq, biz Prezıdenttiń tapsyrmasy boıynsha bir aıdyń ishinde jańa usynystardy engizýimiz shart. Usynystar halyqaralyq talaptarǵa sáıkestikke qatysty bolady. Biz 12 jyldyq bilim berý jaǵyna qaraı jyljıtyn bolamyz. Buǵan kóshý baǵyty 11 jyldyq bilim plıýs 1 jyl mektep aldyndaǵy daıyndyq aıasynda iske asyrylady»,-dedi mınıstr.
A. Sárinjipovtyń aıtýynsha, qazirgi kezde mektepke deıingi daıarlyq baǵdarlamasy Qazaqstanda 6 jastaǵy barlyq balalardyń 95 paıyzyn qamtyp otyr.
«Biz mektep aldyndaǵy daıarlyq baǵdarlamasyn jańartýdy jaqsartý baǵyty boıynsha júretin bolamyz»,-dedi vedomstvo basshysy.
