12 jyldyq bilim berý júıesi keıinge shegeriledi - BǴM
ASTANA. QazAqparat - Qazaqstanda 12 jyldyq bilim berý baǵdarlamasyn engizý keıinge shegeriledi. Búgin Parlament Senatynyń jalpy otyrysynan keıin jýrnalısterge bergen suhbatynda Bilim jáne ǵylym mınıstri Aslan Sárinjipov málimdedi.
«Elimizdiń birqatar mektepterinde tájirıbe júzinde 12 jyldyq bilim berýdiń jańa standarttaryna synaq jasalǵan. Aǵymdaǵy jyldyń mamyrynda bul synaq aıaqtalady. Biz osy synaqtyń nátıjelerin qarastyryp, sosyn 12 jyldyq bilim berýge kóshýdi shegerý týraly usynys jasaıtyn bolamyz», - degen mınıstr resmı vedomstvonyń ustanymy osyndaı ekenin alǵa tartty. Onyń sózine qaraǵanda, atalǵan jańa baǵdarlama boıynsha 400-ge tarta oqýshy bilim alyp jatyr. Al synaq aıasynda qoldanylǵan barlyq jumystar men nátıjeler 11 jyldyq baǵdarlamany jaqsartý úshin paıdalanylady. Degenmen, vedomstvo basshysy 12 jyldyq bilim berý júıesiniń qansha ýaqytqa shegerilip otyrǵanyn naqtylaǵan joq. Mınıstrdiń aıtýyna qaraǵanda, jańa júıeni engizýdi shegerýge birqatar faktorlar, sonyń ishinde qarjylyq máseleler basty ról atqaryp otyr. Osyǵan oraı, Bilim jáne ǵylym mınıstri Prezıdenttiń tapsyrmasyna sáıkes, Úkimet ekonomıkadaǵy jaǵdaıǵa qatysty túrli stsenarııler boıynsha jumystar atqaryp jatqanyn jetkizdi.
