12 jolaýshy tasymaldaýshy kýálikten aıyryldy - KKM
ASTANA. 15 mamyr. QazAqparat - Birneshe márte tártip buzǵany, kestelerdi saqtamaǵany jáne avtobýstardy arnaıy belgilenbegen oryndardan jóneltkeni úshin 12 tasymaldaýshynyń (303 avtobýs) qyzmet kórsetýge quqyq beretin kýálikteri keri qaıtaryldy. Olardyń arasynda qalaaralyq jáne oblysaralyq jolaýshy tasymaldaıtyn turaqty qatynap júrgen avtobýstar bar. Bul týraly Kólik jáne kommýnıkatsııa mınıstrliginiń baspasóz qyzmetinen habarlandy.
Mınıstrlikke qarasty kóliktik baqylaý organdarynyń tekseristeriniń qorytyndylary boıynsha 2013 jyldyń basynan beri jolaýshylar tasymalymen shuǵyldanatyn 2372 tasymaldaýshy ákimshilik jaýapkershilikke tartylǵan. Atap aıtqanda kompanııalar júrgizýshilerdiń eńbek jáne tynyǵý erejelerin buzǵan, júrgizýshilerdi reıs aldyndaǵy medıtsınalyq tekseristen jáne avtokólik quraldaryn tehnıkalyq baıqaýdan ótkizbegen, sonymen birge jolaýshylar men júkti tasymaldaý erejelerin buzýǵa jol bergen.
Munyń syrtynda, kóliktik baqylaý beketteriniń qyzmetkerleri bıylǵy jyldyń basynan beri sheteldik tasymaldaýshylar tarapynan jiberilgen 2075 ereje buzýshylyǵy anyqtalǵan. Búgingi kúnge kóliktik baqylaý beketteri ruqsat berý júıesi talaptaryn oryndamaǵan 35 sheteldik tasymaldaýshylardy ustaǵan. Olardyń arasynda belorýssııalyq 8, túrkııalyq 5, taǵy basqa tasymaldaýshylardyń joldary kesilgen.
«Jalpy, sheteldikterge ruqsat etý qujattary halyqaralyq kelisimder negizinde beriletindigin eske salamyz. Árbir memleket áriptes elge óz aýmaǵy arqyly júk tasymaldaýǵa quqyq beretin belgili bir mólsherde kvota bólip otyrady. Sol sebepti, kvota almaǵan nemese onyń merzimin asyryp alǵan tasymaldaýshylardyń shet memleketterde júk tasymaldaýǵa quqyǵy joq. Bul sharalar ár memlekettiń óz ishinde otandyq tasymaldaýshylardy qoldap otyrýǵa baǵyttalǵan», - delingen baspasóz habarlamasynda.
