12 jyldyq bilim berý júıesi toqtaı ma — Oqý-aǵartý mınıstriniń jaýaby
ASTANA. KAZINFORM — Prezıdent Tamyz konferentsııasynda jasaǵan málimdemesinde 18 jasqa tolǵan jasóspirimder mektep partasynda otyrýynyń durystyǵyna kúmán keltirgen bolatyn.
Bul másele boıynsha Oqý-aǵartý mınıstri Juldyz Súleımenovanyń pikirin suraǵan edik.
— Memleket basshysy Qasym-Jomart Toqaevtyń tapsyrmasyna sáıkes, Oqý-aǵartý mınıstrligi 12 jyldyq bilim berý modelin qaıta qarastyryp, elimiz boıynsha bilim berý merzimin birizdendirý máselesin zerdelep jatyr. Onyń ishinde barlyq mektep úshin 11 jyldyq biryńǵaı modelge kóshý múmkindigi de qarastyrylady, — dedi ol.
Juldyz Súleımenovanyń sózinshe, mınıstrliktiń negizgi ustanymy — elimizdiń barlyq balasyna biryńǵaı talaptar men teń bilim alý múmkindigin qamtamasyz etý.
— Jańa Konstıtýtsııaǵa sáıkes, memleket jalpyǵa mindetti bilim berý standarttaryn belgileıdi. Sondyqtan menshik nysany men bilim berý modeline qaramastan, barlyq bilim berý uıymdarynyń qyzmeti osy talaptarǵa sáıkes kelýi tıis. Bul másele oqý jyldarynyń sanyn mehanıkalyq túrde qysqartýmen shektelmeıdi. Eń aldymen balanyń jas jáne fızıologııalyq erekshelikteri, oqý júktemesi men bilim mazmuny eskeriletin bolady. Sonymen qatar tehnologııalardyń qarqyndy damýy, eńbek naryǵyndaǵy jańa talaptar jáne ekonomıkanyń ózgerý dınamıkasyna kóńil bólinedi, — dedi ol.
Osyǵan baılanysty mınıstrlik bilim berý standarttaryn, oqý baǵdarlamalary men oqý júktemesin keshendi túrde qaıta qaramaq.
— Jumys qorytyndysy boıynsha, ár balanyń jasyna saı sapaly bilim alýyna múmkindik beretin jáne elimizdegi bilim berý talaptaryn birizdendirýge baǵyttalǵan naqty usynystar engiziledi, — dep túıindedi mınıstr.
Aıta keteıik, buǵan deıin Oqý-aǵartý mınıstri oqýlyqtardaǵy 700 qate jóninde Prezıdent synyna jaýap bergenin jazǵanbyz.
