12 jeltoqsanda elimizdiń 7 qalasy men 3 oblysynda sabaq onlaın ótedi

12 jeltoqsanda elimizdiń 7 qalasy men 3 oblysynda oqýshylar sabaqty qashyqtan oqıtyn boldy, dep habarlaıdy Kazinform.

Bilim basqarmasynyń qabarlaýynsha, Astanada aıazdyń kúsheıýine baılanysty 12 jeltoqsanda  birinshi aýysymdaǵy 0-11 synyp oqýshylary men kolledjderdiń 1-2 kýrs stýdentteri sabaqty onlaın oqıtyn boldy.

Aqtóbe qalalyq bilim bóliminiń habarlaýynsha, 12 jeltoqsan kúni aýa raıynyń qolaısyzdyǵyna baılanysty birinshi aýysymnyń sabaǵy onlaın formatqa kóshirildi. 0-9 synyp oqýshylary qashyqtan oqıdy.

Qaraǵandy qalasynyń bilim bólimi de 12 jeltoqsanda qatty aıazǵa baılanysty birinshi jáne ekinshi aýysymnyń 0-11 synyp oqýshylarynyń sabaǵy qashyqtan oqý formatyna kóshirilgenin habarlady. 

Kókshetaýda -36℃ aıazǵa baılanysty birinshi aýysymnyń 1-11 synyp oqýshylary onlaın oqıtyn boldy. 

Sondaı-aq, Aqtaý qalasy jáne Mańǵystaý oblysyndaǵy mektep oqýshylary men kolledj stýdentteri qashyqtan oqýǵa aýysty. Sınoptıkter bul óńirde qatty jel soǵyp, kóktaıǵaq bolady degen boljam jasaǵan. 

Qostanaı oblysynda da úskirik aıaz kúshine minip tur. Aýa temperatýrasy -32℃, -34℃-qa deıin tómendeýine baılanysty Qostanaı qalasynda birinshi aýysymdaǵy 0-11 synyp oqýshylary qashyqtan oqıtyn boldy. 

Bilim basqarmasynyń habarlaýynsha, oblystaǵy Áýlıekól, Qamysty, Jitiqara, Meńdikól, Altynsarın, Beıimbet Maılın aýdandarynda da oqýshylar sabaqty onlaın formatta ótedi.

Sınoptıkterdiń boljamy boıynsha, 12 jeltoqsanda Qyzylorda oblysynda jel soltústikten 9-14, oblystyń ortalyǵynda 15-20 m/s ekpinmen soǵady, aýanyń temperatýrasy túnde -20-25 ℃, oblystyń soltústiginde -29 ℃, kúndiz -15-20 ℃, oblystyń ońtústiginde -10 ℃ aıaz kútiledi.

Osyǵan baılanysty, Aral, Qazaly, Qarmaqshy, Jalaǵash, Syrdarııa aýdandary men Qyzylorda qalasyndaǵy barlyq mektepterdiń (memlekettik, jekemenshik) 0-11 synyp oqýshylary; Shıeli, Jańaqorǵan aýdandaryndaǵy mektepterdiń (memlekettik, jekemenshik) 0-9 synyp oqýshylary 12 jeltoqsan kúngi sabaqtaryn qashyqtyqtan oqytý formatynda ótedi.