12 jastaǵy úndistandyq balanyń júregi 10 jasar qazaq qyzynyń keýdesinde soǵatyn boldy

Jol apatynda qaza bolǵan balanyń júregi Chennaı aýrýhanasynda tórt aıdan beri donor kútip jatqan Dılnaz Isanǵa transplantatsııalandy. Bul týraly «The times of India» saıty Chennaı qalasynan habarlaǵan.

«10 jasar qazaqstandyq qyzǵa Keralada qaza tapqan balanyń júregi salyndy» degen taqyryptaǵy aqparat bere otyryp, agenttik balanyń jol apatynda kóz jumǵanyn habarlaǵan.

«Tórt aıdan beri Úndistanda donor kútip, ómirden kúderin úzbegen 10 jasar qazaqstandyq qyzǵa seısenbi kúni saý júrek tabyldy. Oǵan Kerala shtatyndaǵy balanyń júregi transplantatsııalandy. Dárigerler 10 jasar qazaq qyzyna úlken kardıomıopatııa dıagnozyn qoıǵan. ıAǵnı, júrek óte álsiz jáne qan aınalymyn kótere almaı kez kelgen sátte toqtap qalýy múmkin edi. Al, bul sátte «Fortık» aýrýhanasynyń dárigerleri ákesimen birge jol apatyna túsip, aýyr jaraqattanǵan 12 jastaǵy Adız Polsonnyń ómiri úshin kúresken edi. Biraq ajalǵa ara túse almady. Adızdiń anasy balasynyń saý organdaryn alýǵa ruqsat bergen. Aýrýhana mamandary birden Kerala shtaty men basqa da shtattardyń aýrýhanalaryna organdar týraly habarlama jiberedi. Úndistan boıynsha Adızdiń júregi dál keletin naýqas bolmaǵan soń, organdy Qazaqstannan kelgen qyzǵa berý týraly sheshim qabyldandy. Fortıs aýrýhanasynyń dárigerleri aıtqandaı, olar áýejaıdan túse sala «jasyl dáliz» arqyly ótip, Chennaı aýrýhanasyndaǵy qyzǵa operatsııa jasaı bastaǵan»,-dep jazady The times of India saıty.

10 jastaǵy qazaq qyzynyń jaǵdaıyn bilý úshin QR Syrtqy ister mınıstrligine habarlastyq. «Qazir óz qarajaty esebinen shet elderde, sonyń ishinde Úndistanda da emdelip jatqan qazaqstandyqtar kóp. Olardyń keıbireýi Elshilikte tirkelmeıdi de. Sondyqtan, osy operatsııa týraly Elshilikten habar bolsa, jarııalaımyz»,-dedi baspasóz qyzmetiniń ókili.