12 jastaǵy kókshetaýlyq «maıtaban» dıagnozy bar balalarǵa aıaq kıim shyǵarýda
Kókshetaý qalasyndaǵy №5 «Tańdaý» mektep-gımnazııasynyń 6-synybynda oqıtyn onyń ózine de osy dıagnoz qoıylǵan. Biraq tabandylyqtyń, sporttyń arqasynda bala óz aýrýyn jeńdi.
«Týǵannan maıtaban boldym. Aıaqtarym jıi aýyratyn. Aıaǵyma únemi gıps taǵyp júrdim. Ony kıgizip, sheshý janyma batyp, qatty qınalatyn edim. Úsh ret ota jasaldy. Qıynshylyqtyń barlyǵyna shydap, eń sońynda bul dertten qulan taza aıyǵyp shyqtym. Men úshin bul úlken jeńis boldy», – deıdi Zaýrbek ıAndıev.
Týa bitken dertten aıyqqan ol «maıtaban» dıagnozy qoıylǵan balalarǵa kómek kórsetýge sheshim qabyldady. Osy baǵytta óz kásibin ashyp, termojapsyrmalary bar jeńil jeıdeler, saptyaıaqtar, ydystar tárizdi ónimderdi shyǵarýdy qolǵa aldy. Túsken aqshanyń bir bóligin qaıyrymdylyq kómek retinde muqtaj jandarǵa beredi.
«Qazirgi kezde, ózim sııaqty maıtaban balalarǵa qolymnan kelgenshe kómek jasap júrmin. Olar ózderin jalǵyz sezinbegenin qalaımyn. Búgingi karantın ýaqytynda kóp adamdardyń qarajattan qınalyp júrgeni belgili. Ásirese, úılerinde naýqas balalary bar otbasylarǵa óte qıyn. Kóp ata-analardyń qymbat ortopedııalyq aıaq kıim satyp alýǵa qaltalary kótere bermeıdi. Al bul onsyz da aýrý balalardyń densaýlyǵyna odan saıyn keri áserin tıgizetini sózsiz. Sol sebepti, men osyndaı balalarǵa qolymnan kelgenshe kómektesýdi sheshtim», – deıdi Zaýrbek ıAndıev.
Jýyrda ol ortoped dárigerler arqyly aıaǵynda týa bitken derti bar balany izdep taýyp, oǵan óz qolynan shyqqan ortopedııalyq aıaq kıimdi syıǵa tartty. Býrabaı aýdanynyń Kenesary aýylynda turatyn 10 jasar Baqtııar Bespaıdyń anasy Rahıma Ábdiǵaparova Zaýrbektiń yqylasyna razy bolyp, onyń meıirimdiligi men jomarttyǵy úshin shyn júrekten analyq alǵysyn bildirdi.
Aıta keteıik, jas kásipker Zaýrbekke kásibin dóńgeletýge ata-anasy, ápkesi jáne inisi kómektesýde.
