12 jastaǵy qazaqstandyq dron-pılot AQSh-taǵy álem chempıonatynda besinshi oryn aldy
ASTANA. KAZINFORM — Oral qalasynyń 12 jastaǵy turǵyny Álıhan Nysanbaev AQSh-ta ótken MultiGP World Championship 2026 álem chempıonatynda 44 elden kelgen sportshylarmen baq synap, fınalda besinshi oryn ıelendi. Ol dron-fýtboldan ótken halyqaralyq týrnırde de Qazaqstan quramasy sapynda úzdik bestiktiń qataryna engen.
Dron jarysy — sportshy arnaıy kózildirik arqyly ushqyshsyz ushý apparatyn basqaryp, ony kúrdeli kedergilerden ótkizetin jyldamdyq saıysy. Munda drondy dál ári shapshań basqarý, baǵytty durys tańdaý jáne bir sátte sheshim qabyldaý mańyzdy.
Álıhan álem chempıonatyna 5-6 aı daıyndalǵan. Al onyń jattyqtyrýshysynyń aıtýynsha, halyqaralyq jarysqa irikteý men júıeli daıyndyq eki jyl buryn bastalǵan. Bıyl naýryzda ótken respýblıkalyq jarysta jeńiske jetken oqýshy AQSh-ta ótetin chempıonatqa joldama alǵan.
— Naýryzda ótken respýblıkalyq jarysta birinshi oryn alyp, AQSh-qa barýǵa múmkindik aldym. Álem chempıonatynda 12 fınalıstiń qataryna enip, besinshi orynǵa turaqtadym. Sezimimdi sózben jetkizý qıyn. Qarsylastarym óte myqty boldy. Ásirese Ońtústik Koreıa men Japonııadan kelgen sportshylardyń sheberligi erekshe áser qaldyrdy. Olardyń jasy 21-22-de, menen áldeqaıda úlken. Soǵan qaramastan, jarys barysynda tanysyp, dostasyp kettik, — dedi Álıhan Nysanbaev Jibek Joly telearnasynyń «Búgin.LIVE» baǵdarlamasynda.
Jattyqtyrýshysynyń sózinshe, Álıhan halyqaralyq jarystarǵa alǵash ret qatysyp otyrǵan joq. Byltyr da álem chempıonatynda baq synap, ekinshi oryn alǵan. Bıyl ekinshi ret álemniń úzdik dron-pılottarymen jarysyp, fınalǵa deıin jetti.
Drondy basqarýdyń óz ereksheligi bar. Álıhan jarys drondaryn arnaıy kózildirik arqyly basqarady. Al dron-fýtbolda sportshylar arnaıy pýltti paıdalanady. Jattyqtyrýshynyń túsindirýinshe, bul eki baǵytta qoldanylatyn drondardyń kólemi men basqarý tásili de ártúrli.
— Maǵan jyldam drondarmen jarysqan unaıdy. Qarapaıym drondar men sımýlıatorlarǵa qaraǵanda, jarys drondary áldeqaıda shapshań. 2022 jyly úıirmege alǵash keldim. Birtindep qyzyǵýshylyǵym artyp, bul sportpen aınalysa bastadym. Óıtkeni dron jarysy ári ádemi, ári óte jyldam ótedi, — deıdi jas sportshy.
Drondy basqarý syrt kózge ońaı kóringenimen, oǵan uzaq daıyndyq qajet. Jattyqtyrýshynyń aıtýynsha, oqýshylar aldymen arnaıy sımýlıatorlarda jattyǵady. Keıin shaǵyn drondardy basqaryp úırenip, sodan soń ǵana jarysqa arnalǵan úlken apparattarǵa kóshedi. Buǵan qosa, olar drondy qurastyryp, baptaýdy da meńgeredi.
— Álıhan drondy ózi baptap, basqara alady. Mundaı úıirmelerde balalar tek ushqyshsyz apparatty basqarýdy ǵana emes, ony qurastyrýdy da úırenedi. Bul olardyń shydamdylyǵyn, zeıinin jáne logıkalyq oılaý qabiletin damytady, — dedi jattyqtyrýshysy.
Qazir úıirmede Oral qalasyndaǵy balalarmen qatar, oblystyń 12 aýdan ortalyǵynan kelgen oqýshylar da bilim alady. Olardyń arasynda aýyl balalary da bar. Jattyqtyrýshynyń aıtýynsha, balalardyń dron sportyna qyzyǵýshylyǵy jyl saıyn artyp keledi. Oqýshylardyń sheberligin shyńdaý úshin oblystyq jarystar da uıymdastyrylady.
Maman dron tehnologııalaryn tek sportpen baılanystyrýǵa bolmaıtynyn aıtady. Onyń sózinshe, bul daǵdy aýyl sharýashylyǵy, qaýipsizdik, medıtsına jáne kınoındýstrııa sııaqty kóptegen salada qajet. Sondyqtan balalardy dron basqarýǵa úıretý — bolashaqta suranysqa ıe tehnologııalardy meńgerýdiń bir joly.
Al Álıhannyń aldaǵy maqsaty aıqyn. Ol bolashaqta álem chempıony atanǵysy keledi. Al mamandyq tańdaý týraly ázirge naqty sheshim qabyldamaǵan.
Buǵan deıin astanalyq stýdenttiń aýylsharýashylyq dronyn oılap tapqany týraly jazǵan edik.
