12 jasynda ana atanǵan pavlodarlyq qyzdyń oqıǵasyna qatysty jańa derek shyqty
PAVLODAR. KAZINFORM - Pavlodar oblysy Sharbaqty aýylynyń turǵyny, jaqynda sábıli bolǵan 12 jas taǵy qyzdyń jaǵdaıyna qatysty jańa derekter shyqty. Jasóspirim qyzdyń otbasy 2019 jyly Monǵolııadan Qazaqstanǵa kóship kelgen.
Buǵan deıin habarlaǵanymyzdaı, Pavlodarda 12 jastaǵy oqýshy qyz dúnıege sábı ákeldi. Ol oblystyq perınataldyq ortalyǵynda aman-esen bosandy. Jaǵdaıǵa óńirdegi balalar ombýdsmeni Sáýle Shákenova aralasyp, biraz jaıttardy anyqtady.
Belgili bolǵandaı, kámeletke tolmaǵan qyzdyń ata-anasy 2019 jyly týystarynyń shaqyrýymen Monǵolııadan Qazaqstanǵa qonys aýdarǵan. Otbasyndaǵy bes balanyń úsheýi qazaq jerinde dúnıege kelgen. Sharbaqty aýdanyna turaqtaǵan shańyraq munda esepke alynyp, ataýly áleýmettik kómek rásimdegen. Al otaǵasy 12 jastaǵy qyzy oqyp jatqan mektepke jumysqa ornalasqan.
«Qazirgi ýaqytta kámeletke tolmaǵan qyzdyń anasy 2022 jyly týǵan bala kútimi boıynsha úıde otyr. Anasy oqı da, jaza da bilmeıdi. Tek qujattarǵa qol qoıǵanda óziniń esimin jazýǵa qabiletti. Otaǵasynyń 6 synyptyq bilimi ǵana bar, eshqandaı mamandyq meńgermegen. Mektep qazandyǵynda ot jaǵýshy bolyp eńbek etken, biraq qazirgi sátte jumys istemeıdi. Úlken qyzynyń júkti ekenin ata-anasy mektep ustazdarynan bilgen. Pedagogterdiń talabymen, ata-anasynyń ruqsatymen ÝDZ-dan ótip, júkti ekeni belgili bolǵan. Jasóspirim budan soń Pavlodardaǵy júkti áıelderge arnalǵan patologııa bólimshesine jatqyzylyp, arada 10 kún ótkende aýdandyq aýrýhana dárigerleriniń qaraýyna jiberilgen. Munda mektep oqýshysy úsh jarym aıdaı ýaqyt bolǵan. Osy ýaqyt ishinde qyzǵa mektep muǵalimderi men aýyl ákimdigi kıim-keshek pen aıaq kıim, jeke gıgıena zattaryn satyp alyp berip turǵan. Oqýshy mekteptegi sabaǵyn qashyqtan jalǵastyrǵan», - dep habarlady Sáýle Shákenova.
Al balanyń ákesi atalǵan otbasynyń týysy bolyp keledi. Ol da kámelet jasyna tolmaǵan. Búginde zorlaý boıynsha qylmystyq is qozǵalǵan. Qyzdyń ata-anasy zorlyq jasaǵan týysynyń otbasymen baılanysty úzgenin jetkizgen.
«Kámeletke tolmaǵan ana oblystyq perınataldyq ortalyǵynan shyǵarylǵan soń qaıda baryp turatyny jaqyn ýaqytta sheshiledi. Seksýaldyq zorlyq-zombylyq faktisiniń bolǵany týraly qyzdyń ákesi de, anasy da bilmeıtin bolyp shyqty. Mektep ákimshiligi kámeletke tolmaǵan qyz balanyń júkti bolyp qalǵany jáne oǵan qatysty jynystyq zorlyq-zombylyq jasalýy múmkindigi týraly málimetti ýákiletti jáne quqyq qorǵaý organdaryna birden habarlaǵan», - dep túsindirdi balalar ombýdsmeni.
Atalǵan oqıǵadan soń Sharbaqtydaǵy mektep dırektory óz erkimen jumys ornynan ketken. Al aýdandyq bilim berý bóliminiń basshysyna qatań sógis jarııalandy.
