12 jasar sýretshi óz kórmesin anasyna arnady
ASTANA. 21 qyrkúıek. QazAqparat - Búgin Astanadaǵy Qazirgi zaman óneri murajaıynda Ámir Joldasbekovtyń shyǵarmashylyq kórmesi ashyldy.
12 jasar sýretshi óz kórmesin dúnıeden ozǵan anasy Ámına Qabykenovaǵa arnap otyr.
Almaty qalasynyń týmasy Á.Joldasbekov búginde Astana ekonomıkalyq lıtseıiniń 5-synybynda oqıdy. Sondaı-aq ol A.Musaqojaeva atyndaǵy óner mektep-kolledjinde bilim alady. Bala kezinen bastap sýret ónerine jaqyn júrgen Ámirdiń jan-jaqty damýyna onyń anasy Ámına Qabykenovanyń qosqan úlesi zor. Ol kishkentaı balasynyń shyǵarmashylyq qabiletin barynsha damytyp, mýzyka ónerine de beıimdedi. Osynyń arqasynda kishkentaı sýretshiniń dúnıetanymy men kózqarasy keńeıdi. Ony Á.Joldasbekovtyń shyǵarmalarynan aıqyn baıqaýǵa bolady. Ásirese, qazaqtyń keń dalasy men jaılaýda júrgen jylqylardy beınelegen sýretter kóz tartady. Kishkentaı Ámirdiń zerdesiniń keńdigi, óz eline, jerine degen sheksiz súıispenshiligi seziledi. Budan basqa, kórmede avtordyń sońǵy 3 jylda salǵan 36 jumysyn kórýge bolady. Á.Joldasbekovtyń anasy Ámına Qabykenovany eske alýǵa arnalǵan kórmeni jas sýretshiniń ájesi Ulbolsyn uıymdastyryp otyr.
