12 jasar sportshy qazaqstandyq ústel tennısi tarıhyndaǵy eń jas sport sheberi atandy
ORAL. QazAqparat - Oral qalasynda ótken ústel tennısinen Qazaqstan chempıonatynda 12 jasar qaraǵandylyq Alan Qurmanǵalıev erekshe kózge tústi, dep habarlaıdy QazAqparat tilshisi.
Birinshilik 1998 jyly týǵan jáne odan da jas uldar men qyzdar arasynda ótti. Qaraǵandy oblysy atynan segiz raketka sheberi qatysty. Komandalyq synaqta qaraǵandylyq tennısshiler - birinshi oryndy, jasóspirimder - úshinshi oryndy ıelendi.
Jeke birinshilikte altyn medaldi sport sheberi, ulttyq quramanyń múshesi Záýresh Aqasheva, qola medaldi Aleksandra Smırnova jeńip aldy. Qyzdar juptyq razrıadta úshinshi boldy.
Aralas juptyq razrıadta Alan Qurmanǵalıev pen Záýresh Aqasheva jeńiske jetti. Qaraǵandy oblysy quramasynyń eń jas múshesi sport sheberi normatıvin oryndady. Mundaı jetistik Qazaqstan ústel tennısiniń tarıhynda alǵash ret bolyp otyr.
Bir aı buryn ITTF Halyqaralyq federatsııasy qurlyqtyq, álemdik Hopes Week týrnırleriniń qorytyndysy boıynsha Alan Qurmanǵalıevti 2019 jylǵy úzdik jas tennısshi dep ataǵan edi.
Respýblıkalyq chempıonattyń barlyq jeńimpazdary men júldegerleri - oblystyq balalar men jasóspirimder olımpıadalyq rezerv mektebiniń tárbıelenýshileri.
