12 jasar qyzǵa kúsh kórsetip, telefonyn tartyp alǵan kúdikti ustaldy
TALDYQORǴAN. QazAqparat - Almaty oblysynyń Eńbekshiqazaq aýdanyndaǵy Báıterek aýylynda bolǵan qaraqshylyq oqıǵasy boıynsha kúdikti ustaldy, dep habarlaıdy QazAqparat tilshisi.
Almaty oblysy Polıtsııa departmentiniń baspasóz qyzmetiniń málimetinshe,
oqıǵa 27 sáýir kúni saǵat 18:00 shamasynda bolǵan. Beıtanys adam kóshede kele jatqan 12 jastaǵy jasóspirim qyzǵa dene jaraqatyn salyp, qolyndaǵy uıaly telefonyn tartyp alǵan. Oqıǵa kýágeri bolǵan turǵyn shuǵyl polıtsııaǵa habar berip, kúdiktiniń qaı baǵytta ketkenin aıtqan.
«Kýágerdiń aqparatyna sáıkes kúdiktini ustaý maqsatynda jedel izdestirý sharalaryn júrgizdik. Birneshe kósheler men tuıyq kósheler tekserildi. Qaltarystar men qalyń butalardyń arasynan kúdiktini taptyq. Ustaý kezinde ol qarsylyq kórsetti, degenmen qoıanqoltyq urys ádisimen ony jyldam tutqyndap, kisen saldym. Oqıǵa ornynan qoldy bolǵan uıaly telefon tabylyp, tárkilendi»,- dedi aýyldyq polıtsııa ınspektory polıtsııa aǵa leıtenanty Eldar Erejepov.
Polıtsııa taratqan aqparatqa sáıkes, tekserý barysynda kúdiktiniń 37 jastaǵy Almaty qalasynyń turǵyny ekeni, onyń buǵan deıin birneshe ret qylmystyq jaýapkershilikke tartylǵany jáne polıtsııadan boı tasalap júrgeni anyqtaldy. Qaraqshylyq faktisi boıynsha QR Qylmystyq kodeksiniń 191-babyna sáıkes sotqa deıingi tergeý amaldary júrgizilýde. Kúdikti qazir ýaqytsha ustaý oqshaýlaǵyshyna qamaqqa alyndy.
Aıta keteıik, zardap shekken jasóspirim qyz dárigerlerdiń tekserýinen keıin úıine jiberildi. Tártip saqshylary kúdiktiniń ózge de qylmystarǵa qatysy baryn anyqtaýda.
