12 jasar qyz bala júrgizýshisi esinen tanǵan, ishi balaǵa toly avtobýsty toqtatyp úlgerdi
ASTANA. 22 jeltoqsan. QazAqparat - AQSh-ǵy Mınnesota shtatynyń Leık-Elmo qalasynda taıaýda ótkirsıýjetti Gollıvýd fılminiń stsenarııine uqsas oqıǵa boldy.
Jergilikti mektepterdiń birinde oqıtyn jetinshi synyp oqýshylaryn shańǵy tebýge apara jatqan avtobýstyń júrgizýshisiniń júrek talmasy ustap qaldy. Sonyń saldarynan kóptonnalyq mashına basqarylmaı, kólik jolynan shyǵyp ketti.
Aıqaılap, jylaı bastaǵan ondaǵan balanyń ishinde tek 12 jasar Rena Krafston ǵana sabyrlylyq tanytyp, oqys oqıǵany baǵalaı aldy. Avtobýstyń sońynda otyrǵan qyz bala jalma-jan júrgizýshiniń ornyna júgirip baryp, tejegishti basyp úlgergen. Sóıtip ol ózin de, qasyndaǵy qurbylaryn da apattan qutqaryp qaldy.
