12 jasar álem chempıony Islam Qabdollov jyl úzdigi atandy
Bıyl 11 jasynda batýttyq gımnastıkadan Bakýde ótken álem chempıonatynda jeńimpaz atanǵan Islam Qabdollov «Jyl serpilisi» atalymymen marapattaldy.
BQO dene shynyqtyrý jáne sport basqarmasynyń basshysy Qaımen Esendııarovtyń aıtýynsha, bıylǵy jyl óńir sportshylary úshin jemisti boldy.
Sonyń ishinde jýyrda, Táýelsizdik kúni 12-ge tolǵan Islam jasóspirimder arasynda óńirde alǵash ret sporttyq akrobatıkadan álem chempıony atandy.
«Islam Qabdollov bolashaǵynan úlken úmit kúttiredi. Biz osyndaı jas jetkinshekterimizdi qoldaýymyz kerek. Islam bapkeri Albert Tilepqalıevpen birge áli talaı jeńiske qol jetkizedi dep oılaımyn», dedi Q.Esendııarov.
Sondaı-aq dzıýdoshy Karına Takıeva «Úmit artar sportshy», Oral qalasynyń dene shynyqtyrý jáne sport bólimi «Buqaralyq sportty damytýǵa qosqan úlesi úshin», voleıboldan «Gratsııa-KZ» klýby «Úzdik komanda», Qasym Qajenov «Úzdik bapker», №2 balalar-jasóspirimder sport mektebi «Úzdik sporttyq uıym», parataekvondodan álem chempıony Málik Muqashev «Paralımpıadalyq sport túrlerinen úzdik sportshy» atandy.
Sol sekildi toǵyzqumalaqtan Azııa chempıony Jarashan Saǵynbaev «Ulttyq sport túrlerinen úzdik sportshy», grepplıng sheberi Zaıreden Muhambetjanov «Olımpıadalyq emes sport túrlerinen úzdik sportshy», short-trekten 2021 jylǵy álem kýbogy kezeńiniń kúmis júldegeri Ádil Ǵalıahmetov «Qysqy sport túrlerinen úzdik sportshy», bokstan Azııa chempıonatynyń kúmis júldegeri Danııal Sábıt «Jazǵy olımpıadalyq sport túrlerinen úzdik sportshy» atalymy boıynsha úzdik shyqty.
Qorytyndy is-shara barysynda sport salasynyń qyzmetkerleri Qazaqstan Respýblıkasynyń Mádenıet jáne sport mınıstrliginiń vedomstvolyq nagradasymen, Batys Qazaqstan oblysy ákimdigi, Qazaqstan Respýblıkasynyń Mádenıet jáne sport mınıstrligi Sport jáne dene shynyqtyrý isteri komıteti jáne BQO dene shynyqtyrý jáne sport basqarmasynyń alǵyshattarymen marapattaldy.
Basqarmadan túsken málimetke qaraǵanda, qazirgi kezde oblysta dene shynyqtyrý men sportpen júıeli shuǵyldanýshylar sany 232 680 adamǵa jetti. Bul – óńir halqynyń 35 paıyzy.
2021 jyly oblys sportshylary túrli dodalarda 1071 medal jeńip aldy. Sonyń ishinde álem chempıonatynda 14 altyn, 7 kúmis, 6 qola, Azııa birinshiliginde 8 altyn, 8 kúmis, 3 qola júldege ıe boldy.
Eske sala keteıik, budan buryn qazaqstandyqtyń batýttaǵy gımnastıkadan álem chempıony atanǵanyn jazǵan bolatynbyz.
Sondaı-aq qazaqstandyq parataekvondoshy álem chempıony boldy.