12 sáýir. Qazgıdromettiń kún raıyna jasaǵan boljamy
NUR-SULTAN. QazAqparat - Qazgıdromet Qazaqstan aımaqtarynda 2022 jylǵy 12 sáýirde bolatyn erekshe meteorologııalyq qubylystarǵa boljaý konsýltatsııasyn jarııalady, dep habarlaıdy QazAqparat.
QR terrıtorııasynyń basym bóliginde atmosferalyq frontaldy bólikterdiń áserinen jańbyr jaýady, ońtústik jartysynda qatty jańbyr bolyp, naızaǵaı oınaıdy. Tek elimizdiń ońtústik-batysynda, soltústiginde, shyǵysynda joǵary qysym alqaby áserinen jaýyn-shashynsyz aýa raıy kútiledi. Respýblıka boıynsha jeldiń kúsheıýi, ońtústikte daýyl, soltústik-batysynda tuman, ońtústik-batysynda shańdy daýyl kútiledi.
Almaty oblysynyń kúndiz shyǵysynda, taýly jáne taý bókterli aýdandarynda naızaǵaı kútiledi, oblystyń ońtústigi jáne shyǵysynda jel 18-23 m/s kúsheıedi. Túrkistan oblysynyń batysynda, taýly jáne taý bókterli aımaqtarynda naızaǵaı, daýyl kútiledi, naızaǵaı kezinde jel ekpini 15-20 m/s kúsheıedi.
Jambyl oblysynyń ońtústik-batysynda, soltústik-shyǵysynda, taýly aımaqtarynda naızaǵaı kútiledi, jel 15-20, ekpini 25 m/s kúsheıedi. Aqmola oblysynyń ońtústik-batysynda naızaǵaı kútiledi, jel 15-20, oblystyń soltústiginde, shyǵysynda ekpini 23-28 m/s kúsheıedi. Qaraǵandy oblysynyń batysynda, ońtústiginde naızaǵaı kútiledi, túnde jel 15-20 m/s, kúndiz oblystyń basym bóliginde 15-20, ekpini 25 m/s kúsheıedi.
Qyzylorda oblysynyń ortalyǵynda, ońtústiginde túnde jáne tańerteń naızaǵaı, daýyl kútiledi, oblystyń ortalyǵynda jel 15-20 m/s kúsheıedi. Soltústik Qazaqstan oblysynyń túnde ońtústik-batysynda, kúndiz basym bóliginde jel 15-20, ekpini 25 m/s kúsheıedi. Kúndiz Atyraý oblysynyń batysynda, Mańǵystaý oblysynyń batysynda, shyǵysynda, ońtústiginde naızaǵaı kútiledi, jel 15-20 m/s kúsheıedi.
Aqtóbe oblysynyń ońtústiginde, ortalyǵynda tuman kútiledi. Qostanaı oblysynyń ońtústiginde naızaǵaı kútiledi, oblystyń ońtústiginde, shyǵysynda jel 15-20 m/s kúsheıedi. Kúndiz Batys Qazaqstan oblysynyń batysynda, ońtústiginde naızaǵaı kútiledi. Shyǵys Qazaqstan oblysynyń ońtústik-batysynda, ońtústiginde, kúndiz Pavlodar oblysynyń ortalyǵynda jel 15-20 m/s kúsheıedi.
