12 myńnan astam qazaqstandyq jeńildetilgen nesıemen kólik aldy

NUR-SULTAN. QazAqparat – QR Premer-Mınıstriniń birinshi orynbasary Roman Sklıar jeńildetilgen avtonesıe baǵdarlamasy týraly aıtyp berdi, dep habarlaıdy QazAqparat tilshisi.

«Biz mólsherlemeni 50%-ǵa tómendettik, ÓKM (óndirýshilerdiń keńeıtilgen mindettemeleri) qarajaty túsip turady. Bul aqsha ekologııalyq is-sharalarǵa da, osyndaı baǵdarlamalarǵa da jumsalady. Men qazir aıtqan baǵdarlamalar ekologııany jaqsartady. Biz bıznes pen azamattarymyzǵa avtokólikti jańartýǵa da, ekologııany jaqsartýǵa da kómektesemiz», - dedi Roman Sklıar Úkimet kýlýarynda tilshilerge bergen suhbatynda.

Vıtse-Premer jeńildikpen avtonesıelendirýdi qosymsha qarjylandyrý múmkindigi bolsa, mindetti túrde paıdalanatynyn aıtty.

«Baǵdarlama halyq arasynda óte tanymal. Jeńildetilgen avtonesıeleýge 100 mlrd teńge bólingen, baǵdarlamany 12 myńnan astam turǵyn paıdalandy», - dedi Roman Sklıar.

Eske sala keteıik, avtokólikterdi jeńildetilgen nesıemen berý baǵdarlamasyna taǵy 10 mlrd teńge bólindi. Indýstrııa jáne ınfraqurylymdyq damý mınıstrligine qarasty Ónerkásipti damytý qorynyń dereginshe, 4 paıyzben beriletin avtonesıe baǵdarlamasyna qatysýshy «Eýrazııalyq bankke» - 35 mlrd, «Bank Tsentr Kredıtke» - 27,5 mlrd, «Halyq bankke» - 22,5 mlrd jáne «Forte Bank»-ke 15 mlrd teńge bólingen.