12 myńnan astam aýyl turǵynyna áleýmettik tólemder taǵaıyndaý máselesine qatysty keńes berildi
ASTANA. QazAqparat - 2015 jylǵy naýryzdyń 16-sy men qazannyń 5-i aralyǵynda elimizdiń shalǵaı eldi mekenderinde turatyn 12 432 adam arnaıy jumyldyrý toptarynyń quramynda aýyldarǵa barǵan Zeınetaqy tóleý jónindegi memlekettik ortalyqtyń, «Qazposhta» AQ jáne HQKO mamandarynan zeınetaqy jáne járdemaqy taǵaıyndaý máselesi jóninde keńester aldy.
«Aýyl turǵyndaryna memlekettik qyzmetterdi kórsetý úshin atalǵan uıymdardyń 830 qyzmetkeri jumyldyryldy. Atqarylǵan jumys qorytyndysynda kómekke júgingen 12 432 azamattyń 8 078-i túrli áleýmettik tólemderdi rásimdeý boıynsha keńes aldy, sondaı-aq 2305 adamnan derektemelerdi ózgertý jóninde ótinishter qabyldandy. Al 2049 aýyl turǵyny zeınetaqy jáne járdemaqy taǵaıyndaýǵa qujattaryn tapsyrdy», - delingen QR Densaýlyq saqtaý jáne áleýmettik damý mınıstrliginiń habarlamasynda.
Aǵymdaǵy jyly jumyldyrý toptary elimizdiń barlyq óńirlerinde 3 691 shalǵaı aýyldyq okrýgti qamtyp, 6 341 ret eldi mekenderge bardy.
Atap aıtqanda, 5 qazandaǵy jaǵdaı boıynsha, 2024 ótinish berýshige zeınetaqy jáne járdemaqy taǵaıyndaldy. Jumyldyrý toptarynyń jumysy qanatqaqty rejimde jyldyń sońyna deıin sozylady. Turǵylyqty jeri boıynsha qyzmet alýshylarǵa qyzmet kórsetý (qujattardy qabyldaý jáne shot ashý) memlekettik qyzmetti alý ýaqytyn jáne shyǵyndardy tómendetýdi, qolaılylyqty, ońaılatylǵan tártipti qamtamasyz etedi.
Buǵan deıin habarlanǵandaı, aǵymdaǵy jylǵy 12 naýryzda «Zeınetaqy tóleý jónindegi memlekettik ortalyq» RMQK, «Qazposhta» AQ jáne «Halyqqa qyzmet kórsetý ortalyǵy» RMK arasynda Ózara túsinistik jáne yntymaqtastyq týraly memorandýmǵa qol qoıyldy. Atalǵan qujat «Áleýmettik-eńbek salasyndaǵy memlekettik qyzmetterdi ońtaılandyrý jáne avtomattandyrý máseleleri jónindegi Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» QR Zańyn iske asyrýǵa baǵyttalǵan.
