12 myń tonna karantındi ónim Qazaqstan shekarasynan keri qaıtaryldy

ASTANA. QazAqparat - 2017 jyly 12 myń tonnaǵa jýyq karantınge jatqyzylǵan ónim eksporttaýshy elge qaıtaryldy. Bul týraly búgin Úkimet otyrysynda fıtosanıtarııalyq qaýipsizdiktiń jaı-kúıi týraly baıandaǵan QR Aýyl sharýashylyǵy birinshi vıtse-mınıstri Arman Evnıev aıtty, dep habarlaıdy QazAqparat.

«Ótken jyly karantınge jatqyzylǵan ónimderdi ákelý men tranzıtteý barysynda júrgizilgen baqylaý kezinde Eýrazııalyq ekonomıkalyq odaq pen Qazaqstan Respýblıkasynyń ósimdikter karantıni salasyndaǵy zańnamasyn buzǵan 1202 fakti anyqtaldy. Onyń ishinde 276 fakti boıynsha karantındik obektiler tabyldy. 86 mln teńge somasyna aıyppuldar salynyp, 12 myń tonnaǵa jýyq karantınge jatqyzylǵan ónim eksporttaýshy el aýmaǵyna qaıtaryldy, 121 myń tonna joıyldy», - dedi A.Evnıev.

Onyń dereginshe, 2018 jylǵy naýryzdaǵy jaǵdaı boıynsha Qazaqstannyń ósimdikter karantıni salasyndaǵy zańnamasyn buzǵan 254 fakti anyqtaldy. Onyń ishinde 9 fakti boıynsha karantındik obektiler tabylyp, 11,3 mln teńge somasyna aıyppuldar salyndy.

«Utqyr toptar qurýdyń arqasynda 2017 jylǵy qazannan bastap Qyrǵyzstan aýmaǵynan karantınge jatqyzylǵan 4,2 myń tonna ónim tasymalynyń joly kesildi»,- dedi Arman Evneev.

foto:primeminister.kz