$12 mlrd ınvestıtsııa tartylmaq - Prezıdent «QazaqGaz» basshysyn qabyldady
ASTANA. KAZINFORM - Memleket basshysy «QazaqGaz» UK» AQ basqarma tóraǵasy Sanjar Jarkeshovti qabyldady. Prezıdentke ulttyq kompanııanyń byltyrǵy atqarǵan jumysynyń esebi berilip, aldaǵy kezeńge arnalǵan jospary tanystyryldy, dep habarlaıdy Aqordanyń baspasóz qyzmeti.
Qasym-Jomart Toqaevqa aýqymdy ınfraqurylymdyq jobalardyń iske asyrylý barysy, Qashaǵan gazyn óńdeýdiń jańa baǵyttary, sondaı-aq gaz salasyna 12 mıllıard dollar kóleminde ınvestıtsııa tartý máselesi jóninde baıandaldy.
Sanjar Jarkeshovtiń aıtýynsha, «QazaqGaz» kompanııalar toby óńirlerdi damytý úshin áleýmettik-ekonomıkalyq mańyzy bar iri gaz qubyrlaryn tartyp, iske qosqan. Olardyń quny 400 mıllıard teńgeden asady.
Memleket basshysyna elimizdi gazben qamtý jumystary týraly málimet berildi. Atap aıtqanda, 11 óńirdegi 112 eldi meken gazǵa qosyldy. Nátıjesinde qosymsha 213 myń turǵyn tabıǵı gazben qamtamasyz etildi. Kompanııa byltyr ishki naryqtaǵy gaz baǵasyn sýbsıdııalaýǵa 175 mıllıard teńge bóldi. Sonymen qatar «QazaqGaz» UK» aktsıonerlik qoǵamy tabıǵı gazdy eksporttaý jáne tasymaldaý jónindegi mindettemelerin tolyq oryndap otyr.
Budan bólek, Prezıdentke jańa «Anabaı» gaz ken ornyn paıdalanýǵa berý, sondaı-aq gazdyń resýrstyq bazasyn damytý jumystary jóninde aqparat berildi. Qabyldanǵan sharalardyń arqasynda elimizdiń ishki naryǵyna gaz jetkizý kólemi 19 paıyzǵa ulǵaıdy.
Qasym-Jomart Toqaevqa berilgen málimetke sáıkes ulttyq kompanııa aýa raıy kúrt sýytyp, gaz tasymaldaý júıesine shekten tys júkteme túsken kezde ishki naryqtyń suranysyn tolyqtaı ótep, turǵyndardy kógildir otynmen úzdiksiz qamtamasyz etken.
Kezdesý sońynda Memleket basshysy gaz salasyn keshendi túrde damytýǵa, sonyń ishinde ishki naryqty gazben turaqty túrde qamtýǵa, resýrstyq bazany keńeıtýge, atalǵan salanyń ózekti máselelerin sheshýge jáne onyń ınvestıtsııalyq tartymdylyǵyn jaqsartýǵa baǵyttalǵan birqatar tapsyrma berdi.
