1,2 mln-nan astam maıdanger deregin qamtıtyn «Batyrlarǵa taǵzym» portaly ázirlenip jatyr

Qorǵanys mınıstrliginiń málimetinshe, bul bastama Prezıdenttiń Ulttyq quryltaıda bergen tapsyrmasy aıasynda qolǵa alynǵan.

Aýqymdy jumys QR Ulttyq qorǵanys ýnıversıtetinde júrgizilip jatyr. Munda joǵary oqý oryndary Qorǵanys mınıstrliginiń Ortalyq muraǵatyna tapsyrǵan oblystyq jáne aýdandyq áskerı komıssarıattardyń áskerge shaqyrý jónindegi alfavıttik kitaptary óńdelý ústinde. 

Osyndaı maqsatpen áskerı oqý oryndaryn, mınıstrliktiń beıindi departamentterin, Qarýly kúshterdiń bólimshelerin, Petropavl qalasyndaǵy Ulttyq ulan akademııasyn jáne azamattyq joǵary oqý oryndarynyń 30 áskerı kafedrasyn biriktirgen vedomstvoaralyq jumys toby quryldy. Qujattardy fotolap tirkeý jáne olardy biryńǵaı elektrondyq bazaǵa engizý jumystary iske asyrylyp jatyr.

– Bizdiń aldymyzda soǵys jyldary áskerge shaqyrylǵan 1 mıllıon 200 myńnan astam qazaqstandyq týraly derekterdi tsıfrlyq formatqa kóshirý mindeti tur. Kóptegen otbasy úshin bul – ata-babalarynyń taǵdyryn bilýge, olar týraly estelikti saqtap, keıingi urpaqqa jetkizýge múmkindik. Bul jumysqa 20 myńnan astam áskerı kafedra stýdentteri, odan ózge áskerı oqý oryndarynyń kýrsanttary men kadetteriniń jumylýy jobaǵa qosymsha bilimdik ári patrıottyq mán berip otyr, - dedi Qorǵanys mınıstriniń tárbıe jáne ıdeologııalyq jumystar jónindegi orynbasary general-maıor Asqar Mustabekov.

Aldaǵy ýaqytta tsıfrlyq resýrs maıdangerlerdiń urys qımyldaryna qatysqany, marapattary jáne ómirbaıanyn týraly ózge de derekterimen tolyqtyrylady. Bul aqparat izdeýdi jeńildetip qana qoımaı, buǵan deıin sol salanyń mamandaryna ǵana qoljetimdi bolǵan biregeı muraǵattyq materıaldardy ǵylymı aınalymǵa engizýge múmkindik beredi.

Buǵan deıin habarlaǵanymyzdaı, BQO-da Jeńis kúnine oraı 6 maıdangerge 1,5 mln teńgeden beriledi.