12 mln. kompıýterge vırýs juqtyrǵan haker sottaldy
ASTANA. 24 jeltoqsan. QazAqparat - Slovenııalyq haker Matıak Shkorıants zııandy baǵdarlama jasap, ony satý arqyly búkil álem boıynsha 12 mıllıon kompıýterge vırýs juqtyrǵan. Sol úshin ol Marıbor qalasy sotynyń sheshimimen 4 jyl 10 aıǵa túrmege qamaldy, dep habarlady STA agenttigi.
Tergeý málimetteri boıynsha, medıtsına salasynda oqyǵan Shkorıants negizinen vırýsty Ispanııada óz klıentterine 250-den 1000 eýroǵa deıin satyp otyrǵan. Onyń bul áreketinen álem boıynsha jeke tulǵalarǵa, kompanııalarǵa, bankter men memlekettik mekemelerge kelgen zalal ondaǵan mıllıon eýroǵa baǵalanyp otyr.
Sonymen birge jasy 27-ge kelgen aıyptalýshyǵa úsh myń eýro kóleminde aıyppul salynyp, onyń zańsyz jolmen tabylǵan múlkin tárkileý týraly sheshim shyǵaryldy.
