12 myńnan astam túlek pedagogıka mamandyǵyna grant aldy — Toqaev
ASTANA. KAZINFORM — Prezıdent elimizde pedagog mamandyǵyn tańdaǵan jastardyń qatary artyp kele jatqanyn jaqsy úrdiske balady. Memleket basshysy bulsh týraly Aqordada ustazdardyń kásibı merekesine oraı saltanatty is-sharada aıtty.
— Bıyl 12 myńnan astam túlek, sonyń ishinde eki myńnan asa «Altyn belgi» ıegeri pedagogıka mamandyǵy boıynsha memleket grantyna ıe boldy. Muǵalimdik jolyn tańdaǵan stýdentterdiń shákirtaqysy 2,5 ese kóbeıdi. Jańa oqý jyly qarsańynda aımaqtarda 15 myńnan astam muǵalim jumysqa qabyldandy. Olardyń jartysyna jýyǵy — jas mamandar. Bul — mektepterge bilimdi, jigerli, ushqyr oıly muǵalimderdiń jańa býyny kelip jatyr degen sóz. Ustazdyqqa endi qadam basqan jas mamandarǵa aǵa býyn kóp kómek kórsetýge tıis. Sonda olar da óz isiniń naǵyz sheberi bolyp qalyptasady. Sondaı-aq kásibı sabaqtastyq dástúri paıda bolady. Biz oqý-aǵartý salasynyń kadrlyq áleýetin kúsheıte túsýimiz kerek. Bilikti muǵalimdi myqty memlekettiń tuǵyry dep aıtsaq, artyq bolmaıdy. Bul turǵydan alǵanda, elimizdiń joǵary oqý oryndary aıryqsha ról atqarady. Sebebi ýnıversıtet qabyrǵasynda bolashaq mamannyń kásibı bilimi men daǵdysy qalyptasady. Budan bólek, bilim-ǵylym salasyndaǵy halyqaralyq yntymaqtastyqty kúsheıtýge basa mán berý mańyzdy. Shet memleketterge saparlarym kezinde men álemniń ozyq oqý oryndarymen baılanys ornatý, yqpaldastyqty nyǵaıtý máselesine aıryqsha nazar aýdaramyn, — dedi Qasym-Jomart Toqaev.
Prezıdent aldymyzda aýqymdy mindet turǵanyna nazar aýdardy. Bul — jahanda tsıfrlyq órkenıet pen bilim ekonomıkasy saltanat qurǵan dáýirde ómir súrip, ónegeli istermen aınalysatyn azamattar býynyn tárbıelep shyǵarý.
— Sondyqtan meniń tapsyrmammen Jasandy ıntellektini orta bilim berý júıesine josparly túrde engizý úderisi bastaldy. Durys paıdalana bilse, jańa tehnologııa muǵalimderdiń qyzmetin áldeqaıda jeńildetedi, olardy artyq jumystan bosatatyn senimdi quralǵa aınalady. Tálimgerlikke den qoıyp, oqýshylarmen tikeleı jumys isteýi úshin ustazdardyń ýaqyty bolýǵa tıis. Bul baǵytta mańyzdy qadam jasaldy. Bıyl qyrkúıek aıynda Oqý-aǵartý mınıstrligi Bilim berý salasyndaǵy jasandy ıntellektini qoldaný standartyn bekitti. Qalada nemese shalǵaı aýylda ornalasqanyna qaramastan, elimizdegi barlyq mektep ozyq ádisteme men tsıfrlyq platformaǵa qol jetkizedi. Bastama jaqsy. Jumys durys baǵytta júrip jatyr. Halyqaralyq PISA-2025 zertteýiniń nátıjesi boıynsha mektepterimizdiń tsıfrlyq daıyndyq deńgeıi Ekonomıkalyq yntymaqtastyq jáne damý uıymyna múshe memleketterdiń ortasha kórsetkishinen asty. Oqýshylardyń kognıtıvti beıimdelý ındeksi ortashadan joǵarylady. Alaıda bul joldyń basy ǵana, toqmeıilsýge sebep emes. Alda aýqymdy jumys kútip tur. Osy jetistikpen toqtap qalýǵa bolmaıdy, — dedi Memleket basshysy.
Aıta keteıik, Memleket basshysy muǵalimderdi kásibı merekesimen quttyqtady.
