12 myń alıment tóleýshiniń qaryzy — 18 mlrd teńge

ASTANA. KAZINFORM – Elimizde 12 myń adamnyń alıment qaryzy bar. Búginde ony somasy 18 mlrd teńgege jetip otyr. Bul týraly Ádilet vıtse-mınıstri Bekbolat Moldabekov aıtty.

— Búginde 12 myń adamnyń 18 mlrd teńge alıment qaryzy bar. Olar alımentterin tólemeı júr. Qazir biz «Ádilet» aqparattyq júıesi arqyly tólemderdi baqylaýǵa aldyq. Máselen, burynǵy erli-zaıyptylar bir-birimen sóılespeıdi delik. Demek, aqshanyń aýdarylǵanyn bilmeı qalatyn jaıttar bolady. Kúıeýi alıment jibergenimen sot oryndaýshysy ony jyldar boıy jubaıyna aýdarmaı júre beredi. Al qazir aqparattyq júıelerdiń, Push-habarlamanyń arqasynda jubaıy burynǵy kúıeýiniń arnaıy esepshotqa alıment jibergenin birden biledi. Aqsha kelesi kúni óziniń shotyna túspese, onda ol birden shaǵymdana alady, — dedi ol Májilistiń jalpy otyrysynan keıin.

Ádilet vıtse-mınıstriniń aıtýynsha, azamattar tarapynan sot oryndaýshylaryna dál osyndaı shaǵym bolǵan jaǵdaıda ádilet organdary olardyń lıtsenzııasyn alyp qoıady.

— Buryn mundaı faktiler bolǵan. Sot oryndaýshylary burynǵy erli-zaıyptylar aralaspaıtyn kezde aqshany ózderine qaldyryp kelgen. Úlken soma, máselen 50 mln teńge bolsa, depozıtke salyp, tabys alýǵa múmkindigi boldy. Qazir ondaıǵa jol berilmeıdi. Aqsha arnaıy esepshotqa tústi me, birden alýshyǵa aýdarý qajet, — dedi Bekbolat Moldabekov.

Aıta keteıik, búgin májilismender ádilet organdarynyń jeke sot oryndaýshylarynyń qyzmetin baqylaý ókilettigin keńeıtetin zań jobasyn birinshi oqylymda maquldaǵan edi.