1,2 mıllıon jas jumyspen qamtyldy: Astanada Jumysshy mamandyqtar jyly qorytyndylandy
ASTANA. KAZINFORM — Elordada Jumysshy mamandyqtar jylyn qorytyndylaýǵa arnalǵan saltanatty is-shara bastaldy. Bul jıyn jumysshy mamandyq ıeleriniń eldiń áleýmettik-ekonomıkalyq damýyna qosqan úlesin kórsetýge, eńbektiń bedelin arttyrýǵa arnalǵan mańyzdy alańǵa aınaldy.
QR Premer-Mınıstriniń orynbasary — Mádenıet jáne aqparat mınıstri Aıda Balaeva
bir jyl boıy jumysshy mamandardyń bedelin arttyrýǵa, kadr daıarlaý jumysyn damytýǵa, bilim berý men ekonomıkanyń naqty sektory arasyndaǵy baılanysty nyǵaıtýǵa erekshe nazar aýdarylǵanyn atap ótti.
Memleket basshysy Qazaqstan halqyna Joldaýynda adal ári bilikti eńbekkerlerdiń bedelin arttyrý qajettigin atap ótti.
— Jumysshy mamandyqtar jyly — bir jyldyq bastama emes, uzaq merzimdi strategııalyq mańyzy zor bastama. Búginde el ekonomıkasynda jumyspen qamtylǵandardyń 3,3 mln adamy jumysshy mamandyqtar boıynsha eńbek etýde. Olar eki myńǵa jýyq túrli tehnıkalyq kásipterdi qamtyp otyr. Kolledjderdi, joǵary oqý oryndaryn, ekonomıkanyń naqty sektoryndaǵy kásipterdi, bıznes qoǵamdastyqty, tsıfrlyq platformalar men áleýmettik salany biriktiretin kásiptik kadrlardy daıarlaıtyn tutas ekojúıe qalyptasty, — dedi A. Balaeva elordada Kongress ortalyqta.
Bıyl mańyzdy ári negizgi basymdyqtardyń biri retinde jastarǵa erekshe nazar aýdarylyp otyr. Jumysshy maman retinde eńbekpen qamtylǵan jastar sany 1,2 mıllıonǵa jetken.
— Jumysshy kásipter ishinde keń tanymal mamandyqtar bar. Máselen aýyl sharýashylyǵy ónimderin shyǵaratyn fermerler 57 myń, dánekerleýshi 25 myńnan astam, avtokólik quraldaryn jóndeýshiler men slesarlar — 16 myń. Bul bir bóligi ǵana. Tórt myńǵa jýyq kásiporyn bolashaq mamandarǵa arnalǵan ashyq esik kúnderin ótkizdi. Oǵan 113 myńnan astam oqýshy men stýdent qatysty, — dedi Aıda Balaeva.
Sonymen birge, joǵary kásibıligi, eńbek jetistikteri jáne el ekonomıkasynyń damýyna qosqan úlesi úshin «Eńbek joly» respýblıkalyq konkýrsynyń jeńimpazdary marapattaldy.
Aıta keteıik, jyl basynan beri 553,7 myń azamat, onyń ishinde 53,5 myńǵa jýyq jumyssyz Skills Enbek kásiptik oqytý platformasynda onlaın-kýrstardan ótkeni týraly sertıfıkat aldy.