12 mıllıard dollar: Aq úı AQSh-tyń Iranǵa qarsy áskerı operatsııaǵa jumsaǵan shyǵynyn eseptedi
ASTANA. KAZINFORM — Aq úı búginge deıin Iranǵa qarsy áskerı operatsııalarǵa jumsalǵan shyǵyn 12 mıllıard dollarǵa jetkenin habarlady. Bul týraly IRNA agenttigi jazdy.
Aq úıdiń ekonomıkalyq keńesiniń dırektory AQSh-tyń Iranǵa qarsy áskerı áreketiniń jalpy qunynyń qazirgi ýaqytta 12 mıllıard dollarǵa baǵalanǵanyn aıtty.
Buǵan deıin, 7 naýryzda BUU Bas hatshysynyń gýmanıtarlyq máseleler jáne tótenshe jaǵdaılar jónindegi úılestirýshisi Tom Fletcher aımaqtaǵy daǵdarystyń yqtımal kúsheıýi jáne qaqtyǵysty qozdyrýshylar AQSh pen Izraıldiń jaǵdaıdy baqylaýdy joǵaltyp alý qaýpi baryn eskertken. Ol «áskerı operatsııany qarjylandyrýǵa kún saıyn shamamen 1 mıllıard dollar jumsalyp jatqanyn» atap ótti.
Pentagonnyń málimetinshe, operatsııanyń alǵashqy eki kúninde AQSh-tyń Iranǵa jasaǵan áskerı soqqylary amerıkalyq salyq tóleýshilerge 5,6 mıllıard dollar shyǵyn ákelgen. AQSh Kongresi baıaý shyǵarylatyn jáne qory shekteýli áýe shabýylyna qarsy zymyrandar men dál basqarylatyn oq-dáriler sııaqty strategııalyq mańyzdy oq-dárilerdiń tez taýsylýyna alańdaýshylyq bildirip otyr. Keıbir zań shyǵarýshylar mundaı shyǵyndar basqa yqtımal qaqtyǵystar úshin qajetti qarýdyń tapshylyǵyna ákelýi múmkin dep sanaıdy.
Aıta keteıik, Taıaý Shyǵystaǵy qaqtyǵystar ýshyǵa bastaǵannan beri Iran, Lıvan jáne Izraılde 1 800-den astam adam qaza taýyp, 12 500 adam jaraqat aldy.
