12 kún úńgirde jatqan ǵalymdy qutqarý operatsııasy sátti aıaqtaldy
ASTANA. QazAqparat - Germanııada eldegi eń tereń Rızendıng úńgirinen shyǵa almaı jatqan speleologty qutqarý operatsııasy sátti aıaqtaldy, dep jazady 24.kz.
52 jastaǵy Iohann Vesthaýzer jer astynda bas-aıaǵy 12 táýlik túnegen.
Esterińizge sala keteıik, 8 maýsymda ǵalym áriptesterimen úńgirlerdi zertteýge attanǵan. Alaıda abaısyzdan basyn tasqa uryp alyp, jaralanǵan ol tereńdigi 1 shaqyrymdyq úńgirden óz betimen shyǵa almaı qalady. Onyń ústine úńgirdiń qulamaly eńisteri men tarlyǵy da qıyndyq týdyrǵan.
Qutqarýshylar ǵalymdy 3 dárigerdiń baqylaýymen jer betine jatqan qalpynda kóterip alyp shyqty. Ony qutqarý operatsııasyna birqatar eýropalyq elderden júzdegen adam qatysqan. Qazir ol dárigerlerdiń qatań baqylaýynda.
