12 qarashany qyzmet babynda erlikpen qaza bolǵan ofıtserler men sarbazdardyń kúni etip belgileý qajet - Halyq Qaharmany B.Ertaev
ASTANA. 13 qarasha. QazAqparat - Búgin Astanada osydan bir jyl buryn Tarazda lańkesti tutqyndaý barysynda qaza bolǵan Ǵazız Baıtasovty eske alý sharasy ótti.
Onda batyrdyń eskertkishine gúl shoqtaryn qoıý kezinde sóz alǵan QR Parlamenti Májilisiniń depýtaty Baqytjan Ertaev zań shyǵarýshy organǵa 12 qarashany qyzmet babynda erlikpen qaza bolǵan ofıtserler men sarbazdar kúni etip belgileýdi usynatyndyǵyn málim etti.
«Beıbitshilik kezinde bizdiń azamattarymyz, bolashaqty oılap, óziniń elin súıgen patrıottarymyz, mańdaıymyzǵa bitken baýyrlarymyz jan berýde. Elimizdiń tynyshtyǵy, bolashaǵy úshin. Tarazdyq Ǵazız Baıtasovtyń da ómir súrgisi kelgen shyǵar, jas, bala-shaǵasy bar. Biraq bolashaqtaǵy tynyshtyq úshin, óz denesimen opasyzdy jaýyp, ózgelerdi aman alyp qaldy. Bul sózsiz batyrlyq, Otanyn súıgendik!», - deıdi áıgili general, Aýǵanstan soǵysynyń ardageri Baqytjan Ertaev.
Onyń aıtýynsha, beıbit zamanda halyqtyń tynyshtyǵyn qamtamasyz etý jaǵdaıynda erligimen qaza bolǵandardyń sany birneshe júz adamnan asyp otyr. Osyǵan oraı, májilismen 12 qarashany qyzmet babynda erlikpen qaza bolǵan ofıtserler men sarbazdardyń kúni retinde belgileýdi zań júzinde qabyldaýǵa kúsh salatyndyǵyn aıtty.
Aıta keteıik, búgin, 12 qarashada Taraz qalasyndaǵy qandy teraktiniń bolǵanyna bir jyl tolyp otyr. Bul kúni eldi úreıge bólegen lańkesshi M.K.Qarıev qarý-jaraq dúkenderiniń birine qaraqshylyq shabýyl jasap, aqyr sońynda ózin-ózi jaryp jiberdi. Sol kezde jol polıtsııasynyń vzvod komandıri, kapıtan Ǵazız Baıtasov qylmyskerdi óz denesimen jaýyp, erlikpen qaza boldy.
