12 qańtarda «Astana-Arena» stadıonynda 7-Qysqy Azııa oıyndarynyń resmı ashylýynyń negizgi daıyndyqtary bastalady

2011 jylǵy Azıadanyń shymyldyǵyn saltanatty jaǵdaıda ashý reseılik kompozıtor Igor Krýtoıdyń jetekshiligindegi prodıýserlik ortalyqqa tapsyryldy.

Osy kúnderi Astana qalasynyń ákimi Imanǵalı Tasmaǵambetov Oıyndarǵa daıyndyq jónindegi uıymdastyrý komıtetimen turaqty túrde keńester ótkizip keledi. Solardyń birinde qala basshysy: «Azıadanyń ashylý saltanaty Oıyndardyń sporttyq baǵdarlamasy sııaqty elimizdiń jáne shet eldik buqara halyq úshin asa mańyzdy. Búgingi kúni jeke-jeke kezeńder boıynsha daıyndyqtar aıaqtaldy. «Astana-Arena» stadıonynda qurylǵylardy ornatý jumystary júrip jatyr. 12 qańtardan bastap naqty is-qımyldar formatyndaǵy daıyndyqtardy bastaımyz», - dep atap ótti.

Osy rette I.Tasmaǵambetov daıyndyqtar kezinde aqparattyq qaýipsizdik máselesin jiti oılastyrýdy qatań tapsyrdy. Sonyń ishinde áýesqoılyq beıne jazylymdardyń aldyn alý úshin daıyndyqtar barysynda uıaly telefondarmen qoldanýǵa tyıym salynatyn bolady.

«Munda aqparattyń jaıylyp ketýine jol bermeýimiz tıis. Qyzyǵýshylyqty sońǵy sátterge deıin saqtaýymyz qajet», - dedi ol.

Eske salaıyq, Qysqy Azııa oıyndarynyń saltanatty ashylýy aǵymdaǵy jyldyń 30 qańtarynda «Astana-Arena» stadıonynda ótedi. Uıymdastyrýshylar saltanatty rásim Táýelsiz Qazaqstan men Azııa oıyndarynyń tarıhyndaǵy eń úlken merekelik baǵdarlama bolady dep ýáde etýde. Sharaǵa respýblıka basshylyǵy, dostastyq elderdiń basshylary, Halyqaralyq Olımpıada komıteti men Azııa Olımpıadalyq keńesiniń prezıdentteri jáne kóptegen basqa da qadirli meımandar qatysady.