12 qańtar. QazAqparat kúntizbesi

12 qańtar. SENBІ

ESTE QALAR OQIǴALAR

1955 jyly Qazaqstan aýmaǵynda, Tóretam kentine jaqyn jerde álemdegi tuńǵysh jáne eń iri ǵarysh aılaǵy - Baıqońyr kentiniń qurylysy bastaldy. 1969 jyly oǵan qala statýsy berildi. KSRO ydyraǵannan keıin Qazaqstan Respýblıkasynyń ıeligine ótken, qazirgi kezde ony Reseı Federatsııasy 2050 jylǵa deıin jalǵa aldy.

1990 jyly Qazaqstan musylmandary dinı basqarmasy quryldy.

1993 jyly Qazaqstandaǵy ekonomıkalyq ózgerister jónindegi Ulttyq keńes quryldy.

1995 jyly Prezıdent Jarlyǵymen qazaq ǵaryshkerleri Toqtar Áýbákirovke, Talǵat Musabaevqa «Halyq Qaharmany» ataǵy berilip, joǵary erekshelik belgisi - «Altyn Juldyz» tapsyryldy.

2002 jyly Almatyda qoǵam jáne memleket qaıratkeri Dinmuhamed Qonaevtyń murajaı úıi ashyldy.

2006 jyly Aqordada Elbasy Nursultan Nazarbaev pen Reseı Prezıdenti Vladımır Pýtın kezdesip, ekijaqty kelissózder júrgizdi.
Osy kelissózderdiń barysynda Nursultan Nazarbaev pen Vladımır Pýtın Qazaqstan Respýblıkasy men Reseı Federatsııasynyń arasyndaǵy qazaqstandyq-reseılik memlekettik shekara jónindegi Shartty bekitý týraly gramotalar almasý hattamasyna qol qoıdy.

2006 jyly Qostanaıda «Qazaq Tulpary» atty respýblıkalyq memlekettik kásiporynnyń quramynan jylqylardyń genetıkasyn zertteıtin elimizdegi alǵashqy zerthana ashyldy. Zerthana asyl tuqymdy jylqylardyń jumysyn jaqsartýǵa múmkindik beredi. Kásiporyn jylqylardyń jańa tuqymyn jasap shyǵarýmen shuǵyldanady. Jańa tuqymnyń arǵy tegin zertteý selektsııany jyldamdatýǵa kómektesedi. Osy baǵyttaǵy jumys eldiń ekonomıkasyna jáne Dúnıejúzilik saýda uıymynyń talaptaryna sáıkes belgilerdiń biri boldy.

2009 jyly Astanada Elbasy Nursultan Nazarbaevtyń qatysýymen Qazaqstan Respýblıkasynyń Tuńǵysh Prezıdentiniń alǵashqy Zııatkerlik mektebi ashyldy. Zııatkerlik mektep balalardyń qabilettilikterin jáne jeke bas múddesin esepke alyp keń aýqymda bilim baǵdarlamalaryn beredi. Bul mektepte tsıfrly tehnıkamen jaraqtanǵan 24 smart-synyptar, 14 ınteraktıvti pándik kabınetteri, 4 fızıka, 6 mýltımedıa kabınetteri bar. Árbir oqýshy ınternetke shyǵatyn derbes noýtbýkpen qamtamasyz etilgen.

2011 jyly Azııa Olımpıadalyq keńesiniń shtab-páteri ornalasqan Ál-Kýveıtte VII qysqy Azııa oıyndarynyń alaýy qazaqstandyq delegatsııaǵa saltanatty túrde tabys etildi.

2011 jyly Almatydaǵy qalalyq poshtamtta 2011 jylǵy 7-shi qysqy Azııa oıyndarynyń Estafetasyna arnaıy shyǵarylǵan poshta mórqalybymen fılatelıstik ónimdi sóndirý rásimi boldy.

Memlekettik tilde jazylǵan «7-shi qysqy Azııa oıyndarynyń Estafeta alaýy. 12.01.2011» jazýy jáne alaýdyń sýreti túsirilgen ashyqhat qazaqstandyqtardyń ómirindegi mańyzdy oqıǵalardyń biri - 7-shi qysqy Azııa oıyndary alaýynyń estafetasynyń quramdas bóligine aınaldy.

2012 jyly Túrkııanyń Adana qalasynda Qazaqstannyń qurmetti konsýldyǵy ashyldy. Qazaqstannyń Adanadaǵy konsýly retinde belgili bıznesmen, «Kýlak ınshaat» korporatsııasy dırektorlar keńesiniń tóraǵasy Tarkan Kýlak taǵaıyndaldy. Ashylý rásiminen keıin qonaqtar Qazaqstan jaıly syr shertetin fotokórmeni tamashalady. Qatysýshylardyń barlyǵyna Qazaqstan Respýblıkasynyń Túrkııadaǵy elshiligi túrik tilinde shyǵarǵan Qazaqstan týraly kitap syıǵa tartyldy.

2015 jyly Talǵat Musabaevtyń ǵaryshqa ushqanyna 20 jyl tolýyna jáne Qazaqstan ǵarysh baılanysynyń 10 jyldyǵyna arnalǵan poshta markalary aınalymǵa shyǵaryldy. Úsh ret ǵaryshqa ushqan ǵaryshker Talǵat Musabaevtyń beınesi túsirilgen mereıtoılyq marka 25 000 danamen shyǵaryldy.