12 iri kompanııanyń ekeýi shyǵynmen jumys istep otyr - Úkimet basshysy
ASTANA. 14 maýsym. QazAqparat - Byltyrǵy jyldyń qorytyndysy boıynsha jarǵylyq kapıtaly bıýdjetten qarjylandyrylǵan 12 iri kompanııanyń ekeýi shyǵynmen jumys istep otyr.
Búgin QR Parlamenti Palatalarynyń birlesken otyrysynda QR Úkimetiniń basshysy Serik Ahmetov osylaı málim etti. Eske salaıyq, jıynda QR Úkimetiniń jáne Respýblıkalyq bıýdjettiń atqarylýyn baqylaý jónindegi esep komıtetiniń 2012 jylǵy respýblıkalyq bıýdjettiń atqarylýy týraly esepteri talqylanýda.
Talqylaý barysynda depýtat Nurtaı Sabılıanov kvazımemlekettik sektor sýbektileriniń jarǵylyq kapıtalyn ulǵaıtýǵa jyl saıyn qarajat ósip otyrǵanyn aıtyp, másele kóterdi. «Tek sońǵy úsh jyldyń ishinde ǵana bir trıllıon teńge osy maqsatqa jumsalǵan eken. Byltyrdyń ózinde 362 mlrd. teńge jaratyldy. Al esep komıteti memleket baqylaýyndaǵy aktsıonerlik qoǵamdar men JShS- lardyń kópshiligi shyǵyndy bolyp otyr», dedi N. Sabılıanov.
Osy máselege jaýap bere kele, Úkimet basshysy kvazımemlekettik sektordyń ekonomıkany damytýdaǵy mańyzy zor ekenin atap ótti. «Sondyqtan da bul salany damytý Úkimettiń únemi nazarynda. Sonymen qatar, keıbir kemshilikterdiń oryn alyp otyrǵany da ras. Naqtyraq aıtqanda, byltyr 12 iri aktsıonerlik qoǵamnyń jarǵylyq kapıtalyn ulǵaıtýǵa respýblıkalyq bıýdjetten 60 mıllıard teńge bólindi. Sonyń ishinde eki sýbekt qana shyǵynmen jumys istep otyr. Olar Respýblıkalyq ǵaryshtyq baılanys ortalyǵy men Syzǵanov atyndaǵy ulttyq hırýrgııalyq ortalyǵy», dedi Premer-Mınıstr.
