12 gradýsqa deıin sýytady: Demalys kúnderine sınoptıkter boljamy

ASTANA.QazAqparat – 12-14 tamyz kúnderi ońtústik tsıklonnyń jáne onymen baılanysty atmosferalyq frontaldy bólikterdiń ótýimen respýblıkanyń basym bóliginde qubylmaly aýa raıy saqtalady. Eldiń soltústiginde, shyǵysynda jáne ortalyǵynda nóser jaýyn, burshaq, 15-28 m/s ekpindegi jel boljanady. Bul týraly QazAqparat «Qazgıdromet» RMK-ǵa silteme jasap habarlaıdy.

«Naızaǵaı kezinde jeldiń kúshi artýy múmkin. Eldiń soltústik-batysynda, soltústigi men ortalyǵynda túngi jáne tańerteńgi ýaqytta tuman kútiledi.

Qazaqstannyń batysynda, soltústik-batysy men ońtústiginde joǵary temperatýramen jaýyn-shashynsyz, ashyq aýa raıy saqtalady. 12-13 tamyzda Atyraý oblysynyń ońtústik-batysynda 42 gradýsqa deıin aptap ystyq saqtalady.

Al soltústik, shyǵys jáne ortalyq óńirlerde aýa temperatýrasy kúndiz 12-20 gradýsqa deıin tómendeýi múkin. Elimizdiń ońtústik-shyǵysynda temperatýra 20-28-ge deıin tómendeıdi», - delingen habarlamada.