12 general dene daıyndyǵy boıynsha synaqtan súrinbeı ótti
ASTANA. KAZINFORM — Elordanyń «Alataý» sport saraıynda Qorǵanys mınıstriniń orynbasarlarymen, Qorǵanys mınıstrligi, Bas shtab jáne Qarýly kúshterdiń qurylymdyq bólimsheleri basshylarymen dene daıyndyǵy boıynsha baqylaý sabaqtary ótti. Joǵary ofıtserlik quramnyń ókilderi – 12 general baqylaý normatıvterin tapsyrdy. Bul týraly Qorǵanys mınıstrligi málim etti.
Baqylaý synaǵy jeke jaýapkershiliktiń aıqyn úlgisi bolyp, búkil jeke quramǵa talapty kúsheıtti. Olar dene daıyndyǵy boıynsha synaqtar tapsyryp, № 3 jattyǵýdy (beltemirge tartylý) jáne № 37 jattyǵýdy (1 shaqyrym júgirý) oryndady.
— Dene daıyndyǵy — áskerı qyzmettiń ajyramas bóligi. Komandırler árdaıym jeke quramǵa úlgi bolýy tıis. Sondyqtan talap qoıýmen qatar, ózderi de sol talaptarǵa saı bolýy qajet. Ásker — bul tek tehnıka ǵana emes, eń aldymen rýhy myqty, fızıkalyq turǵydan daıyn, bilimdi ári tártipti jaýynger, — dedi Qorǵanys mınıstriniń birinshi orynbasary — Qarýly kúshter Bas shtabynyń bastyǵy general-leıtenant Qanysh Ábýbákirov.
Qysqy oqý kezeńiniń qorytyndysy boıynsha baqylaý synaǵyn Sport komıtetiniń ofıtserleri qabyldady. Normatıvterdi oryndaýmen qatar, jattyǵýlardy oryndaý tehnıkasy, tózimdiligi jáne jalpy dene daıyndyǵynyń deńgeıi erekshe nazarǵa alyndy.
Sporttyq is-sharanyń basynda medıtsınalyq qajetti qural-jabdyqtarmen jáne sanıtarlyq kólikpen qamtamasyz etilgen dárigerlik-feldsherlik brıgada turdy.
Jalpy mınıstrliktiń basshylyq quramy jaqsy fızıkalyq daıyndyq deńgeıin jáne belgilengen normatıvterdi tolyq kólemde oryndaýǵa daıyn ekenin kórsetti. Úzdik nátıje kórsetken ofıtserler kelesi jıynda marapattalatyn bolady. Al alynǵan kórsetkishter aldaǵy dene daıyndyǵyn josparlaý kezinde eskeriletin bolady.
Baqylaý sabaqtaryna vedomstvo basshylyǵynyń qatysýy Qarýly kúshterde dene daıyndyǵyna qoıylatyn talaptardyń barshaǵa birdeı ekenin jáne ol jaýyngerlik daıarlyqtyń ajyramas bóligi bolyp qala beretinin kórsetti.
Eske sala keteıik, buǵan deıin elordada Qarýly kúshterdiń úzdik mergenderi anyqtaldy.