12 eldiń ókili ilbis popýlıatsııasyn saqtaý máselelerin talqylaýda
NUR-SULTAN. QazAqparat - Elordada qar barysy popýlıatsııasyn saqtaý máselelerine arnalǵan halyqaralyq konferentsııa bastaldy, dep habarlaıdy QazAqparat tilshisi.
Forýmdy Snow Leopard Foundation halyqaralyq qory uıymdastyryp otyr. «Qar barysyn saqtaý: popýlıatsııalardyń jaǵdaıy, landshafttardy basqarý jáne transshekaralyq yntymaqtastyq» degen taqyryppen ótken forým ilbis popýlıatsııasynyń saqtalýyna jaǵdaı týǵyzatyn tetikterdi iske qosý máselelerin sóz etti.
Snow Leopard Foundation halyqaralyq qorynyń quryltaıshysy Nuráli Álıev forýmǵa BUU sarapshylary shaqyrylǵanyn aıtady.
«Konferentsııada qar barysyna meken bolǵan 12 eldiń ókili bas qosyp otyr. BUU sarapshylarymen birge qar barysynyń popýlıatsııasyna qatysty ǵylymı aqparattar men statıstıkalyq derekterdi bir arnaǵa toǵystyratyn álemdik aqparat ortalyǵyn qurý máselesin qarastyramyz. Nur-Sultan qalasynda ilbistiń biryńǵaı gendik zerthanasyn qurýdy usynyp otyrmyz», - dedi konferentsııany ashqan Nuráli Álıev.
Qazaqstan, Qyrǵyzstan, Ózbekstan, Tájikstan, Aýǵanstan, Pákistan, Mońǵolııa, Qytaı, Úndistan, Nepal, Býtan jáne Reseı ókilderi de konferentsııada sóz alyp, tájirıbelerimen bólisti.
Atalmysh elder BUU damý baǵdarlamasy (UNDP), Dúnıejúzilik jabaıy tabıǵat qory (WWF), Snow Leopard Trust qory, Halyqaralyq tabıǵat qorǵaý qory (IUCN) sııaqty halyqaralyq uıymdarmen birge ózara yntymaqta áreket etý týraly memorandýmǵa qol qoımaq.
