12 el azamattarynyń Qazaqstanǵa vızasyz kirýi týraly Úkimet qaýlysy shyqty
«Búginnen bastap, Qazaqstan Respýblıkasyna vızasyz kirý rejimi bar elderdiń tizimin keńeıtý týraly QR Úkimetiniń qaýlysy kúshine endi. Atap aıtqanda, 45 memlekettiń tizimine qosymsha 12 el engizildi. Olar: Vetnam, Indonezııa, Fılıppın, Taıland, Bahreın, Oman, Kýveıt, Saýd Arabııasy, Kolýmbııa, Lıhtenshteın, Vatıkan jáne Katar. Qaýlymen atalǵan elderdiń azamattary úshin eger olardyń QR-da bolý kezeńi Qazaqstannyń memlekettik shekarasynan ótken sátten bastap 30 kúntizbelik kúnnen aspaıtyn bolsa, vızasyz kirý jáne shyǵý quqyǵyn berý kózdelgen», - dedi QR SІM resmı ókili Aıbek Smadııarov tilshilerge arnalǵan brıfıng barysynda.
Onyń aıtýynsha, vızalyq formaldylyqty joıý, sheteldik ınvestorlardyń, bıznesmender men týrısterdiń sanyn arttyrýǵa baǵyttalǵan vızalyq rejimdi jeńildetý Qazaqstannyń ınvestıtsııalyq ahýalyn jaqsartýǵa yqpal etedi.
«2005-2018 jyldar aralyǵynda Qazaqstanǵa atalǵan elderden 876,3 mln AQSh dollary kóleminde tikeleı ınvestıtsııa tartylǵan. Qazaqstan men joǵaryda kórsetilgen memleketter ózekti halyqaralyq probelamardy retteý jónindegi óz is-qımyldaryn tyǵyz úılestire otyryp, kópjaqty jáne ekijaqty formattarda tıimdi is-qımyl jasaýda», - dedi ol.
Eske sala ketsek, Qazaqstanǵa vızasyz rejimde kire alatyn memleketterdiń tizimi 12 elmen tolyǵatyny týraly buǵan deıin habarlanǵan bolatyn.
