12 adamnyń qazasy: Prokýror isti qysqartýdy surady
AQTÓBE. KAZINFORM - Aıyptalýshy ári júk kóliginiń júrgizýshisi qaza tapty. Prokýror men jábirlenýshiniń bir bóligi isti qysqartýdy surady.
Іs Aqtóbe oblystyq qylmystyq ister jónindegi mamandandyrylǵan aýdanaralyq sotynda qaralyp jatyr. Búgin prokýror aıyptaý qorytyndysyn oqydy.
Qylmystyq is materıalyna súıensek, marqum aıyptalýshy Samara-Shymkent tasjolynda jyldamdyqty asyrǵan ári qarsy jolaqqa shyqqan. Saldarynan 12 adam qaza tapty, 6 joldaýshy jaraqattanyp, em alyp jatyr.
- Hromtaý jaǵynan Qarabutaq aýylyna qaraı baǵyttalyp kele jatyp, kólik jyldamdyǵyn belgilengen shekteýden saǵatyna 110 km deıin asyrady. Qarsy júrýge arnalǵan jolǵa shyǵa otyryp, jolaýshylar tasymaldaıtyn avtokólikpen soqtyǵysty. Nátıjesinde júk kóliginiń júrgizýshisi, jolaýshylar tasymaldaıtyn kólik júrgizýshisi men 10 jolaýshy kóz jumdy. Qaıtys bolǵan júrgizýshi QR Qylmystyq kodeksiniń 345-baby 4-bóliginde kózdelgen qylmystyq quqyqbuzýshylyq jasady, - dedi prokýror.
Sot otyrysy kezinde aıyptalýshynyń ókili júrgizýshiniń qaıtys bolǵanyn aıtyp, isti qysqartýdy surady. Al jábirlenýshilerdiń bir toby shyǵyndy azamattyq is boıynsha óndiretinin aıtty.
- Men aman qalǵan jolaýshynyń jubaıymyn. Qazir joldasym aýrýhanada jatyr. Jaǵdaıy óte aýyr. Sóılemeıdi, júre almaıdy. Bes balamyzdyń ekeýi stýdent. Jaǵdaıymyzdyń ne bolaryn bilmeımin. Em alýymyz kerek. Aqtóbe qalasynan úı alyp berse deımiz, - dedi jábirlenýshi.
Sonymen birge sotqa aman qalǵan jolaýshynyń ózi de kelip, tasymaldaýshy kompanııanyń qatelikterin aıtty.
- Avtobýs degen esh belgi joq. Jol boıy kólikterdi basyp ozyp keldi. Áıteke bıden saǵat 07:00-de shyǵyp, 07:45-te Qarabutaq aýylyna keldik. Taǵy 25 mınýt júrip, apatqa tústik. Jyldamdyǵy saǵatyna 110 km boldy. Keleshekte tártip bola ma? Tekserý kerek qoı. Bul – bizdiń pikirimiz, - dedi jábirlenýshi.
Eske salsaq, qazan aıynda Aqtóbede eki kólik soqtyǵysyp, 12 adam qaza tapty. Oqıǵa Áıteke bı aýdany Belqopa aýyly mańynda boldy. Júk kóligi men jolaýshylar tasymaldaıtyn GAZel soqtyǵysty. Aman qalǵan jolaýshylardyń úsheýi aýyr jaǵdaıda ekeni aıtyldy.
Jol-kólik oqıǵasynan soń Samara-Shymkent tasjolynyń bir bóligi jabyldy.
ІІM Aqtóbe oblysyndaǵy jol-kólik oqıǵasyn tergeý úshin arnaıy top jiberdi.
Aqtóbede jol-kólik apatyna kimniń kináli ekeni naqtylandy.
Premer-mınıstr Oljas Bektenovtiń tapsyrmasymen Aqtóbe oblysy Áıteke bı aýdany Belqopa aýylynyń shetinde bolǵan jol-kólik oqıǵasynyń sebebin tergeý jóninde úkimettik komıssııa qurylǵany anyqtaldy.