12 adamnyń qazasy: Aqtóbede aman qalǵan jolaýshylardyń úsheýi aýyr jaǵdaıda

AQTÓBE. KAZINFORM — Úsh adamnyń jaǵdaıy aýyr, ekeýiniń jaǵdaıy ortasha. Bári de Hromtaý aýdandyq aýrýhanasynda jatyr. 

Aqtóbedegi jol-kólik apaty kezinde aman qalǵan adamdar qazir em alyp jatyr. Bir jolaýshy ǵana aýrýhanaǵa jatpady.

— Medıtsınalyq mekemege jetkizilgen bes adamnyń úsheýiniń jaǵdaıy aýyr, ekeýinde ortasha. Bir adam aýrýhanaǵa jatýdan bas tartqan. Jaraqat alǵandar Hromtaý aýdandyq aýrýhanasyna jetkizildi. Oblys ákimi Ashat Shaharov jol-kólik oqıǵasy bolǵan orynǵa shyqty, — dep habarlady Aqtóbe oblysy ákiminiń baspasóz qyzmeti.

Eske salsaq, oqıǵa búgin Samara — Shymkent tasjolynda boldy. Polıtsııa taratqan aqparatqa súıensek, júk kóligi qarsy baǵytqa shyǵyp ketken.

Jol-kólik oqıǵasy saldarynan eki júrgizýshi men GAZel avtokóliginiń 10 jolaýshysy kóz jumdy.