12 adam mingen Túrkııanyń júk kemesi Qara teńizge batyp ketti

Jeksenbi kúni Qara teńiz jaǵalaýynda Túrkııanyń júk kemesi sýǵa batyp ketti. Onyń bortynda 12 ekıpaj múshesi bolǵan. Kazinform bul týraly Sınhýa aqparat agenttigine silteme jasap habarlaıdy.

Kemeniń sýǵa batqany týraly málimetti dúısenbide Túrkııanyń ishki ister mınıstri Álı Erlıkaıa taratty.

«Bılik ekıpajben baılanys ornata almady», – dedi mınıstr eldiń soltústik-batysyndaǵy Ereglı qalasynda tilshilerge.

Onyń aıtýynsha, «Kafkametrler» kemesi Reseıdiń Temrıýk portynan Túrkııanyń Alıaga qalasyna ferrosıtsılıı tasymaldap kele jatqan. Alaıda daýyl saldarynan Ereglı portynda tolqynnan qorǵaý úshin ornatylǵan konstrýktsııalarǵa soǵylyp, sýǵa ketti.

«Jeksenbi kúni aımaqta qýatty daýyl bastalyp, qolaısyz kún raıy el bıligine izdeý jumystaryn júrgizýge múmkindik bermedi», – dep qosyp ótti Á.Erlıkaıa.

ІІM basshysynyń sózinshe, izdestirý-qutqarý jumystary aýa raıy jaqsarǵan boıda bastalady.