117 jyl buryn Alfred Nobel óziniń bar dáýletin Nobel syılyǵynyń qoryna aýdaratyndyǵy týraly ósıetke qol qoıdy
ASTANA. 27 qarasha. QazAqparat - 1895 jyldyń 27 qarashasy kúni Parıjde shved hımıgi, ınjener, dınamıtti oılap tapqan - Alfred Nobel óziniń ósıet boıynsha murasynyń sońǵy nusqasyna qol qoıdy.
Oǵan sáıkes, onyń dáýletiniń basym bóligi Nobel qoryn qurýǵa jáne ótip bara jatqan jyl ishinde, ultyna baılanyssyz hımııa, fızıka, fızıologııa, medıtsına salalaryndaǵy novatorlardy, sondaı-aq ádebıetshiler men álem úshin paıdasyn tıgizgen adamdardy yntalandyrý úshin syılyqty belgileýge jumsalýy tıis boldy.
Ǵylym men ádebıet salasyndaǵy syılyqtardy - Shvetsııada, al álem syılyǵyn Norvegııada tapsyrý kózdeldi. Osy muragerlik qujattan qory 31 mıllıon kron somasyn quraǵan Nobel qorynyń tarıhy bastaldy.
Bir jyldan keıin, 1896 jyldyń 10 jeltoqsanynda Alfred Nobel Italııada ınsýltten qaıtys boldy. Keıin bul data Nobel kúni dep jarııalandy. Muragerlik boıynsha ósıetti ashqan ýaqytta Nobeldiń barlyq derlik dáýleti onyń týysqandaryna tıesili emes ekendigi belgili boldy.
Alǵash ret Nobel syılyǵy 1901 jyly taǵaıyndaldy. Syıaqy jylyna bir ret Alfred Nobeldiń murasy boıynsha qurylǵan qordyń qarjysynan tólenedi.
