116 medıtsınalyq-áleýmettik mekemeniń jumysy tekseriledi

ASTANA. QazAqparat – Eńbek jáne halyqty áleýmettik qorǵaý mınıstrligi 116 medıtsınalyq-áleýmettik mekemeniń arnaıy qyzmet kórsetý standarttaryn teksermekshi. Bul jaıynda Eńbek mınıstri Tamara Dúısenova vedomstvonyń keńeıtilgen alqa májilisinde aıtty, dep habarlaıdy QazAqparat tilshisi.

«Birinshisi – barlyq 116 medıtsınalyq-áleýmettik mekemege arnaıy qyzmet kórsetý standarttarynyń saqtalýyna tekseris júrgiziletin bolady. Olardyń qorytyndysy boıynsha óńirlerdiń ákimderimen birlesip fýnktsıonaldyq jáne uıymdastyrýshylyq sıpattaǵy sharalar qabyldanady.

Ekinshi qadam – syıymdylyǵy tómen úılerdi, ásirese aýyldaǵy úılerdi qoldaý jáne damytý. Búgingi tańda osyndaı 20 úı jumys isteıdi, olardyń bazasynda AÁQ kórsetýdiń jan basyna shaqqandaǵy normatıvteri synaqtan ótkiziletin bolady. Pılottyń qorytyndysy boıynsha jańa tarıfteý júıesi daıyndalady», - dedi Tamara Dúısenova.

Mınıstrdiń sózinshe muqtaj adamdarǵa qymbat jáne zamanaýı tehnıkalyq kompensatorlyq quraldar teńdeı jetý úshin oblys ortalyqtarynda tehnıkalyq qural parkterin qurý kózdelip otyr. Bul joba «Qazaqstan halqyna» qorynyń qoldaýymen iske asyrylmaq.