115-ke 115: Reseı men Ýkraına tutqyn almasty

ASTANA. KAZINFORM — Senbi kúni Reseı men Ýkraına áskerı tutqyndarmen almasyp, árqaısysy 115 adamdy úıine qaıtardy. Oralǵan ýkraındardyń arasynda «Azovstaldi» qorǵaǵan ondaǵan jaýynger, orystardyń arasynda Kýrsk oblysynda boryshyn ótep júrgen áskerı merzimdi qyzmetkerler bar, dep jazady VVS.

Mámile Birikken Arab Ámirlikteriniń deldaldyǵymen jasaldy.

BAÁ ókilderi bul 2022 jyldan beri taraptar arasyndaǵy 55-shi áskerı tutqyn almasý ekenin jáne onyń kópshiligi Abý-Dabıdiń deldaldyǵymen bolǵanyn atap ótti.

Senbige tutqyn almasý josparlanǵanyn sol kúni birinshi bolyp Reuters habarlady. Oǵan BAÁ ókili anonım túsinikteme bergen. Bir saǵatqa jeter-jetpes ýaqyt ótkende Reseı Federatsııasy Qorǵanys mınıstrligi aıyrbas jasalǵanyn rastady.

Vedomstvonyń málimetinshe, oralǵan 115 orystyń bári — Kýrsk oblysyndaǵy operatsııa kezinde tutqynǵa alynǵandar.

Qazir olar Belarýs elinde, biraz em alyp, ońaltýdan ótkennen keıin úıine jetkiziledi.  

Reseılik «RIA-Novostı» agenttigi orystardyń oralǵany týraly vıdeo jarııalady.

Úıge oralǵan ýkraındardyń arasynda shekarashylar, teńizshiler, Chernobyl atom stantsııasynyń kúzet garnızonynan alty ulttyq gvardııa sarbazy jáne Marıýpoldiń 82 qorǵaýshysy bar, onyń 50-i «Azovstaldi» qorǵaý kezinde tutqynǵa túsken.   

«Ýkraınskaıa pravda» basylymynyń habarlaýynsha, oralǵan adamdardyń toǵyzyn Reseı soty birqatar baptar boıynsha sottaǵan.

Osyǵan súıene otyryp, Reseıde kem degende toǵyz adam áskerı tutqyn emes, qylmysker retinde qamaýda boldy dep boljaýǵa bolady.

BAÁ sheneýnikteriniń aıtýynsha, soǵys bastalǵannan beri Ýkraınada Abý-Dabıdiń deldaldyǵymen 1788 adam aıyrbastalǵan.