115 myńǵa jýyq bala «Balaqaılar mektebi» baǵdarlamasy boıynsha mektepaldy daıyndyqtan ótti
ASTANA. KAZINFORM – Jazǵy demalys kezinde birinshi synypqa baratyn balalarǵa birdeı bastapqy múmkindik berý maqsatynda mektepaldy daıyndyqqa arnalǵan «Balaqaılar mektebi» atty qysqa merzimdi baǵdarlama uıymdastyryldy dep habarlaıdy Oqý-aǵartý mınıstrliginiń baspasóz qyzmeti.
Baǵdarlama mektepke deıingi bilim berý men bastaýysh mektep arasyndaǵy sabaqtastyqty qamtamasyz etedi, balalardy mektepke deıingi tárbıe men oqytýdyń úlgilik oqý baǵdarlamasynyń baǵyttary boıynsha mektepke aldyn ala daıyndaýǵa múmkindik beredi.
Atalǵan baǵdarlama memlekettik jalpyǵa mindetti mektepke deıingi tárbıe men bilim berý standartyna sáıkes ázirlendi.
«Jazǵy kezeńde mektepaldy daıyndyqtan 115 myńǵa jýyq bala ótip, 2,9 myń mekteptiń 5,1 myń bastaýysh synyp muǵalimi men mektepaldy daıarlyq pedagogteriniń qatysýymen oqytý uıymdastyryldy. Oqytý barysynda balalardyń fızıkalyq, kommýnıkatıvtik, ıntellektýaldyq, shyǵarmashylyq jáne áleýmettik-emotsıonaldyq daǵdylary, sondaı-aq mektepke oń kózqarasyn damytýǵa basymdyq berildi», – deıdi Mektepke deıingi bilim berý departamentiniń dırektory Manar Adamova.
Aıta ketý kerek, mektepaldy daıyndyq baǵdarlamasy 1 aıǵa arnalǵan. Bilim berý protsesin bilikti bastaýysh synyp muǵalimderi nemese mektepaldy daıarlyq pedagogteri júzege asyrdy.
