115 myńǵa jýyq azamat mobıldik aýdarymdar erejelerin buzýǵa baılanysty habarlama aldy
ASTANA. KAZINFORM — Memlekettik kirister komıteti 114 839 qazaqstandyqqa aqparattyq hat joldaǵan. Olar tabys deklaratsııasyn tapsyrmaı, kásipkerlikpen aınalysyp jatyr degen kúdikke ilingen.
Vedomstvo málimetinshe, shotqa aı saıyn 100-den asa adamnan aqsha túsýi jáne úsh aıda 1 mıllıon teńgeden artyq qarjy aýdarylýy kásipkerlikpen aınalysýdyń belgileri sanalady.
— QR Qarjy mınıstrliginiń Memlekettik kirister komıteti 2026 jyldyń I toqsanyndaǵy banktik operatsııalary boıynsha kásipkerlik qyzmetten tabys alý belgileri anyqtalǵan jeke tulǵalarǵa aqparattyq hattar joldady, — delingen habarlamada.
Komıtet baspasóz qyzmetiniń habarlaýynsha, mundaı hattar tómendegi belgiler qatar anyqtalǵan azamattarǵa jiberiledi:
• qatarynan úsh kúntizbelik aıdyń árqaısysynda jeke bank shotyna 100 jáne odan da kóp ártúrli tulǵadan aqsha túsýi;
• bank shoty kásipkerlik qyzmetti júrgizýge arnalmaǵan bolýy;
• kórsetilgen kezeńdegi túsimderdiń jalpy somasy 12 eń tómengi jalaqy mólsherinen (ETJ) asýy.
Áıtse de, atalǵan aqparattyq hatty alý azamattyń jaýapkershilikke tartylǵanyn bildirmeıdi. Ol aqparattyq-túsindirý sıpatynda joldanady jáne salyq zańnamasynyń talaptaryna sáıkes óz qyzmetin óz erkimen retke keltirýge múmkindik beredi.
Eger azamattar ondaı hat alsa jáne is júzinde kásipkerlik qyzmetpen aınalyssa, tapqan tabysyn zańdastyrýy kerek. Ol úshin:
• eger buryn tirkelmegen bolsa, jeke kásipker retinde tirkelý;
• alynǵan tabysty tıisti salyq eseptiliginde kórsetý;
• salyq mindettemelerin belgilengen merzimde oryndaý qajet.
Salyq tóleýshiniń mártebesine baılanysty tabys árqalaı kórsetiledi.
Jeke kásipker retinde tirkelmegen nemese ózin-ózi jumyspen qamtyǵan tulǵalarǵa arnalǵan arnaıy salyq rejımin (mobıldi qoldanba túbirtekteri jasalmaǵan somalarǵa qatysty) qoldanatyn jeke tulǵalar 2026 jylǵa arnalǵan Kirister men múlik týraly deklaratsııada (270.00-nysan) tabysyn kórsetýi tıis. Deklaratsııany 2027 jylǵy 1 qańtardan 15 qyrkúıekke deıin tapsyryp, jeke tabys salyǵyn 2027 jylǵy 25 qyrkúıekke deıin tóleýi qajet.
Jeke kásipkerler úshin tabysty kórsetýdiń basqa joly qarastyrylǵan.
Jalpyǵa birdeı belgilengen salyq salý rejımin qoldanatyndar 2026 jylǵa arnalǵan Kásipkerlik qyzmetten alynatyn tabys boıynsha jeke tabys salyǵy deklaratsııasynda (220.00-nysan) tabysyn kórsetedi. Deklaratsııany 2027 jylǵy 1 qańtardan 31 naýryzǵa deıin tapsyryp, salyqty 2027 jylǵy 10 sáýirge deıin tóleýi qajet.
Al ońaılatylǵan deklaratsııa negizindegi arnaıy salyq rejımin qoldanatyndar 2026 jyldyń birinshi jartyjyldyǵy úshin 910.00-nysan boıynsha deklaratsııada tabysyn kórsetedi. Deklaratsııany 2026 jylǵy 1 shildeden 15 tamyzǵa deıin tapsyryp, salyqty 2026 jylǵy 25 tamyzǵa deıin tóleýi qajet.
Eger júrgizilip otyrǵan qyzmet kásipkerlik qyzmet bolmasa nemese alynǵan hat boıynsha azamattardyń suraqtary bolsa, 1414 baılanys ortalyǵyna nemese memlekettik kirister organdaryna júginýge bolady.
— Memlekettik kirister komıteti salyq mindettemelerin ýaqtyly oryndaý salyqtyq ákimshilendirýdiń keıingi rásimderin boldyrmaýǵa múmkindik beretinin eske salady. Salyq mindettemeleri ýaqytynda oryndalmaǵan jaǵdaıda, salyq tóleýshige kameraldyq baqylaý nátıjesinde anyqtalǵan sáıkessizdikter týraly habarlama joldanatyn bolady, — delingen Memlekettik kirister komıteti taratqan aqparatta.
Aıta keteıik, buǵan deıin JTS boıynsha jańa tártip engizilip, bazalyq salyq shegerimi endi kelesi aıǵa aýystyrylmaıtynyn jazǵanbyz.
