114 myń azamatqa habarlama jiberilip, 9,5 myń kásipker tirkeldi – Memlekettik kirister komıteti
ASTANA. KAZINFORM — Qazaqstanda birinshi toqsannyń qorytyndysy boıynsha 114 myńnan astam jeke tulǵaǵa mobıldi aýdarymdarǵa qatysty habarlama jiberildi. Bul týraly BIZDIÑ ORTA podkastynda Óndiristik emes tólemderdi jáne jeke tolyqtyrýlardy ákimshilendirý departamentiniń dırektory Shyndalı Zańǵar baıandady.
Onyń aıtýynsha, baqylaý sharalary jazalaý túrinde emes, azamattarǵa túsindirý jáne servıstik model negizinde júrgizilip jatyr.
Ekinshi deńgeıli bankter belgilengen talaptarǵa sáıkes túsken tólemder boıynsha salyq organdaryna aqparat usyndy. Jiberilgen málimette aýdarymnyń kimge, ne úshin jasalǵany egjeı-tegjeıli kórsetilmeıdi, tek jalpy somasy men tranzaktsııalardyń jıiligi esepke alynady.
— Búgingi tańda birinshi toqsan aýdarymdary boıynsha ekinshi deńgeıli bankter bizge málimet usyndy. Belgilengen ólshemshartqa túsken tólemder boıynsha 114 myńnan astam jeke tulǵanyń aqparaty berildi. Onda kimge, qaı ýaqytta, ne úshin aýdarǵany týraly egjeı-tegjeıli málimet joq. Tek jalpy somalar esepke alynǵan. Biz bul jerde servıstik modeldi qoldanamyz, birden tekseris júrgizilmeıdi, — dedi Shyndalı Zańǵar.
Spıkerdiń aıtýynsha, salyq organdary tarapynan jiberilgen habarlama aıyppul salýdy nemese bank shottaryn buǵattaýdy bildirmeıdi. Eger habarlama kelgen bolsa, salyq tóleýshi óz qyzmetin zańdastyrý qajettigin bildiredi. Memleket azamattardy bir jyl boıy jasyryn baqylap, sońynan úlken aıyppul salmaıdy, kerisinshe aldyn ala eskertý arqyly adal ári ádil kásip júrgizýge jaǵdaı jasaıdy.
Alǵashqy naýqannyń nátıjesi de jaman emes. Habarlama alǵandardyń ishinen 9,5 myńnan astam azamat óz betinshe jeke kásipker retinde tirkelip nemese ózin-ózi qamtý rejımin tańdaǵan.
— Bul tek habarlandyrýdyń arqasynda jetken nátıje. Eshkim olardy májbúrlegen joq, esepshotyn buǵattaǵan joq. Servıstik modeldiń máni de osynda. Memleket azamatqa birinshi kelip, túsindirý jumysyn júrgizedi. Múmkin bul jerde qatelikter bar shyǵar nemese qaýip-qaterler bar ekenin eskertemiz. Ary qaraı jeke tulǵa ózi sheshim qabyldaıdy. 9,5 myńnan astam adam óz bıznesin kóleńkeden shyǵardy, bul kórsetkish áli de artady dep oılaımyz, — dep atap ótti Departament dırektory.
Salyq organdarynyń negizgi maqsaty — salyq tóleıtin jáne tólemeıtin kásipkerler arasyndaǵy teńsizdikti joıyp, adal básekelestik orta qalyptastyrý. Jiberilgen habarlamalarǵa alǵashqy kezeńde dáleldeme usynyp, jaýap berýdiń qajeti joq. Al kelesi jyldan bastap salyq deklaratsııasyn tapsyrý merzimi kelgende, kelispeýshilikter bolsa, elektrondy túrde nemese 30 jumys kúni (is júzinde 45 kún) ishinde aýdandyq salyq basqarmalaryna jaýap berýge múmkindik qarastyrylǵan.
Aıta keteıik, buǵan deıin, Jambylda kásipker lıtsenzııasynan aıyrylyp, 3 mln teńge aıyppul arqalaǵan bolatyn.
